ဘုရားရှေ့မှ ခြင်္သေ့ကြီးများ

ဘီလူးသဘက်တို့နှင့် တိုက်ခိုက်မည့်သူသည် မိမိတို့ကိုယ်တိုင် ဘီလူးသဘက် ဖြစ်မသွားစေရန် သတိထားဖို့လိုသည်။ (နီရှေး)

မြန်မာပြည်သို့ ခေတ္တပြန်စဉ် မိတ်ဆွေသူငယ်ချင်းအချို့က မျိုးစောင့်ဥပဒေအပေါ် မိမိ၏ သဘောထားကို တီးခေါက်ကြည့်ကြသည်။ မိမိကလည်း သူတို့အမြင်ကို စူးစမ်းမိခဲ့သည်။ အင်တာနက်နှင့် ဖေ့ဘုတ်စာမျက်နှာများတွင် တဖက်နှင့် တဖက် အပြန်အလှန် ညစ်ညမ်း ကြမ်းတမ်းသော စကားများဖြင့် ဆဲဆိုဝေဖန် တိုက်ခိုက်နေကြသည့် ထိရှလွယ်သည့် အကြောင်းရာ ဖြစ်သဖြင့် လက်လွတ်စပယ်လည်း မှတ်ချက် မပေးလို။ Politically correct ဖြစ်ရန် သိပ်အားထုတ်နေလျှင်လည်း မပြတ်မသား၊ မရိုးမသား ဖြစ်နေနိုင်သည်။ မိမိက တစ်လင်တစ်မယားစနစ်မှ တပါး ကျန်ဥပဒေများကို သဘောမတူကြောင်း ဖြေ ဖြစ်ခဲ့သည်။ အထူးသဖြင့် ကိုးကွယ်ရာ ဘာသာ ကူးပြောင်းခြင်းဆိုင်ရာ ဥပဒေကို လုံးဝ အတည်မဖြစ်စေလိုကြောင်း ပြောဖြစ်သည်။

မျိုးစောင့်ဥပဒေကို ထောက်ခံသူတို့က အခြားဘာသာများတွင် မိမိတို့ဘာသာတရားကို ကာကွယ်ရန်ရှိပြီး၊ ဗုဒ္ဓဘာသာတွင်သာ မရှိသဖြင့် ဤဥပဒေများသည် တရားမျှတသည်ဟု အကြောင်းပြကြသည်။ အစ္စလာမ်အစွန်းရောက်ဝါဒ၏ အန္တရာယ်ကို ကာကွယ်ရန်လိုကြောင်း ထောက်ပြကြသည်။ မိမိတို့ ဘာသာ၊ သာသနာကို ထိမ်းသိမ်းစောင့်ရှောက်ခြင်းသည် ကောင်းမြတ်သည်ဟု လက်ခံပါသည်။ အစ္စလာမ်အစွန်းရောက်ဝါဒ၏ အန္တရာယ်ရှိမှုကိုလည်း လက်ခံပါသည်။ လူဦးရေပေါက်ကွဲမှု ဖြစ်နေသည့် ဘင်္ဂလားဒေ့ရှ်နိုင်ငံနှင့် နယ်နိမိတ် ထိစပ်နေသဖြင့် အစ္စလာမ်အစွန်းရောက်ဝါဒ၏ အန္တရာယ်ကို ပို၍ သတိထားသင့်သည်။ သို့သော် အစွန်းရောက်ဝါဒကို ဆန့်ကျင် တုန့်ပြန်သောအခါတွင် အစွန်းရောက်ဝါဒကို မကျင့်သုံးမိရန် အရေးကြီးသည်။ အဓမ္မကို အဓမ္မဖြင့် တုန့်ပြန်ခြင်းသည် တရားမျှတသည်ဟု အကြောင်းပြရန် မသင့်။ ထိုနည်းလမ်းများသည် ပျော့ပြောင်းသော မွတ်စလင်များကို အစွန်းရောက်ဝါဒီများ အဖြစ်သို့ တွန်းပို့ရာရောက်စေနိုင်သည်။ ပဋိပက္ခများကို ဖြေရှင်းပေးမည့်အစား ပိုမိုကြီးထွားစေနိုင်သည်။ မိမိကိုယ်တိုင်လည်း အစွန်းရောက် အဓမ္မဝါဒီများ ဖြစ်သွားပေလိမ့်မည်။ ဤနေရာတွင် အသေခံ ဗုန်းခွဲ၊ အကြမ်းဖက်တိုက်ခိုက်သူများကိုသာ အစွန်းရောက်ဝါဒီဟု ဆိုသည်မဟုတ်။ အစွန်းရောက်သော အတွေးအခေါ်များနှင့် အမုန်းတရားအပေါ်အခြေခံသည့် အတွေးအခေါ်များကို လက်ခံ၊ ဟောပြော၊ ဖြန့်ဖြူးသူများသည် အစွန်းရောက်ဝါဒီများပင် ဖြစ်သည်။

မိမိအနေဖြင့် အစ္စလာမ်အစွန်းရောက်ဝါဒအား အန္တရာယ်အဖြစ် ယူဆသည့် အဓိကအကြောင်းရင်းမှာ (၁) နိုင်ငံရေးအာဏာရယူ၍ ရှရီယာ (shariʿa) ဥပဒေဖြင့် ကျင့်သုံးသည့် အစ္စလာမ်နိုင်ငံထူထောင်လိုခြင်း (၂) ဘာသာခြားတို့အား ရန်သူသဖွယ် ဆက်ဆံခြင်း (၃) အစ္စလာမ်ဘာသာကို စွန့်လွှတ်သူများအား သေဒဏ် အထိ ကြီးလေးသော အပြစ်များပေးခြင်း (၄) အမျိုးသမီးများအပေါ် ခွဲခြားဖိနှိပ်ဆက်ဆံခြင်းတို့ ဖြစ်သည်။ အလားတူ အမြင်အယူအဆများဖြင့်ပင် အစ္စလာမ်အစွန်းရောက်ဝါဒကို ဆန့်ကျင် တုန့်ပြန်မည်ဆိုပါက မိမိတို့ကိုယ်တိုင်လည်း အစွန်းရောက်သွားမည် ဖြစ်သည်။

မိမိအမြင်အရ ဗုဒ္ဓဘာသာနိုင်ငံ ထူထောင်ရန် ကြိုးပမ်းမည့်အစား၊ နိုင်ငံရေး, အုပ်ချုပ်ရေး, တရားဥပဒေပြုရေး, တရားစီရင်ရေးတို့တွင် ဘာသာတရား၏ သြဇာလွှမ်းမိုးမှု ကင်းရှင်းစေရန် ကြိုးပမ်းသင့်သည်။ လွတ်လပ်စွာ ကိုးကွယ်ယုံကြည်မှုသည် လူတစ်ဦးချင်းစီ၏ ကိုယ်ပိုင် အခွင့်အရေး ဖြစ်သည်။ မိမိယုံကြည်သည့် ဘာသာတရားကို မိမိ ရွေးချယ် ကူးပြောင်းကိုးကွယ်ခွင့် မရှိဘဲ၊ (မိဘဆွေမျိုးနှင့် အိမ်ထောင်ဖက်တို့မှ အစ) အခြားဘေးလူ တစ်ဦးတစ်ယောက်က ခွင့်ပြုပါမှ ယုံကြည်ကိုးကွယ်နိုင်သည် ဆိုခြင်းမှာ အတော်လေး အဓိပ္ပါယ်မဲ့လွန်းသည်။ စင်စစ် လွတ်လပ်စွာ ကိုးကွယ်မှု၊ လွတ်လပ်စွာ ဘာသာကူးပြောင်းမှုကို ဥပဒေက အပြည့်အဝ အာမခံချက်ပေးခြင်း၊ အတင်းအကြပ် ဘာသာကူးပြောင်းစေခြင်းကို ဥပဒေဖြင့် တားဆီး ကာကွယ်ပေးခြင်းတို့ကသာ လွတ်လပ် ယဉ်ကျေးသော လူ့အဖွဲ့အစည်းနှင့် ဆီလျော်ပါလိမ့်မည်။

အကယ်၍ ဗုဒ္ဓဘာသာ မြန်မာလူမျိုးများကို ကာကွယ် စောင့်ရှောက်ရန်အတွက် လူမျိုးရေး, ဘာသာရေး, ကျားမ ခွဲခြားမှုကို အားပေးသည့် အမြင်များဖြင့် ဘာသာရေး ချုပ်ချယ်ဖိနှိပ်မှုများကို ဥပဒေအဖြစ် ပြဋ္ဌာန်းမည်ဆိုပါက ဆန့်ကျင်ဖက် အကျိုးဆက်များသာ ရနိုင်ပါသည်။ နိုင်ငံတကာမှ ဗုဒ္ဓဘာသာဝင် အများစုကလည်း ဤဥပဒေများကို ထောက်ခံ အားပေးကြလိမ့်မည်မဟုတ်။ ကမ္ဘာအလယ်တွင် မြန်မာဗုဒ္ဓဘာသာတို့အတွက် အရှက်ရစရာသာ ဖြစ်ပါလိမ့်မည်။ ပိုင်းခြားဝေဖန်တတ်သော မြန်မာလူငယ်များ ဗုဒ္ဓဘာသာနှင့် ရဟန်းသံဃာတို့အပေါ် အကြည်ညို ပျက်ကာ၊ သူတို့အား ဘာသာမဲ့များ အဖြစ်သို့ တွန်းပို့သလို ဖြစ်သွားနိုင်သည်။ ဗုဒ္ဓမြတ်စွာ၏ မေတ္တာတရား၊ ခန္တီတရား၊ ဗြဟ္မစိုရ်တရား အဆုံးအမများတို့ကို ပျက်ရယ်ပြု စော်ကားရာ ရောက်သွားနိုင်သည်။

ဤနေရာတွင် ဆရာတော်တစ်ပါး၏ ဥပမာကို ယူသုံးချင်ပါသည်။ ဘုရားရှေ့မှ ခြင်္သေ့ကြီးများကို ရှေ့မှကြည့်လျှင် ဘုရားကို ရန်ပြုမည့်သူများအား ကာကွယ်မည့်ဟန်ဖြင့် ခန့်ခန့်ငြားငြား ရှိလှသော်လည်း၊ ဘုရားဖက်မှ ကြည့်လိုက်လျှင်မူ အမြီးကို ထောင်ထားသဖြင့် အမြင်မတော်ဘဲ ဖင်ပေါ်နေပါလိမ့်မည်။ အမျိုး၊ ဘာသာ၊ သာသနာကို စောင့်ရှောက်ခြင်းသည် ကောင်းမြတ်သည့် ကိစ္စဖြစ်သော်လည်း၊ မုန်းတီးမှုများ၊ အာဃာတများဖြင့် အစွန်းရောက်ပြီး မာန်ဖီနေလျှင်မူ ဘုရားရှေ့မှ ခြင်္သေ့ကြီးများကဲ့သို့သာ ဖြစ်နေပါလိမ့်မည်။