Saturday, October 29, 2011

ပဋ္ဌာန်း ပစ္စယနိဒ္ဒေသ မိတ်ဆက် - ၁၀ (ကမ္မပစ္စည်း၊ ၀ိပါကပစ္စည်း)

ကမ္မပစ္စည်း



ကမ္မပစ္စယောတိ -
၁။ ကုသလာကုသလံ ကမ္မံ ၀ိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။
၂။ စေတနာ သမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ ကမ္မပစ္စယေန ပစ္စယော။


ကမ္မပစ္စည်းသည် (၁) သဟဇာတ ကမ္မပစ္စည်းနှင့် (၂) နာနာက္ခဏိက ကမ္မပစ္စည်းဟု ၂-မျိုးရှိသည်။ ကိုယ်၊ နှုတ်၊ စိတ်တို့ဖြင့် ပြုမူ ပြောဆို ကြံစည်ခြင်းဟူသော လုပ်ဆောင်မှုများသည် ကမ္မ (ကံ) မည်၏။ ဤလုပ်ဆောင်မှုများ အားလုံးတို့သည် စိတ်၏ ပြုလုပ် အားထုတ်မှုဟူသော ပယောဂ ဗျာပါရသဘော မပါဘဲ မဖြစ်။ ထို့ကြောင့် စိတ်၏ အားထုတ်မှု၊ ပြုပြင်စီရင်မှု၊ စေ့ဆော်မှုဟူသော စေတနာ စေတသိက်ကိုပင် ကံဟု ဆိုရသည်။ စေတနာသည် မိမိနှင့် အတူဖြစ်ဖက် စိတ်၊ ဝေဒနာ၊ သညာစသော တရားများအား သိခြင်း၊ ခံစားခြင်း၊ မှတ်သားခြင်းစသော သက်ဆိုင်ရာ အလုပ်များ လုပ်နေကြစေရန် စေ့ဆော်ပေးသည်။ ဤကဲ့သို့ စေတနာတရားက မိမိနှင့် ယှဉ်ဖက် စိတ်စေတသိက်များနှင့် အတူဖြစ်ဖက် ရုပ်တရားတို့အား ပြုပြင်စီရင်ပေးခြင်းအား သဟဇာတ ကမ္မပစ္စည်း ဖြင့် ကျေးဇူးပြုသည်ဟု ဆို၏။

မြေ၌ ကြဲချစိုက်ပျိုးသော မျိုးစေ့သည် နေရောင်ခြည်၊ မိုးရေ၊ မြေဆီသြဇာစသော အထောက်အပံ့များ ပြည့်စုံပါက အပင်ပေါက်သကဲ့သို့၊ ပြုလုပ်အားထုတ်ခဲ့သော စေတနာ ကံမျိုးစေ့သည်လည်း ဂတိ၊ ကာလ၊ ဥပဓိ၊ ပယောဂဟူသော အထောက်အပံ့တို့ ပြည့်စုံပါက ကုသိုလ် အကုသိုလ်ကံအား လျှော်စွာ နောင်တချိန်တွင် အကျိုး ၀ိပါက်ကို ဖြစ်ပေါ်စေနိုင်၏။ ကံကြောင့် ဖြစ်သော စိတ်စေတသိက် အကျိုးတရားတို့သည် ၀ိပါက် (၀ိပါက - ရင့်မှည့်ခြင်း) မည်၏။ ပြုအပ်ပြီးသော (ကဋတ္တာ) ကံကြောင့်ဖြစ်သည့် ကမ္မဇရုပ်တရားတို့သည် ကဋတ္တာ ရုပ် မည်၏။ ကံတရားနှင့် ကံ၏ အကျိုးပေးရာ အချိန်အခိုက်အတန့်တို့ မတူညီကြ၍ နာနာက္ခဏိက (နာနာ - အသီးအသီးသော + ခဏ - အခိုက် + ဣက- ရှိသော) ဟုခေါ်သည်။ ကုသိုလ် အကုသိုလ်ကံတို့က ထိုကံတို့ အားထုတ်စဉ် အချိန်နှင့် မတူသောအခိုက်တွင် ၀ိပါက်နာမ်တရားနှင့် ကဋတ္တာ ရုပ်တရားတို့ကို ဖြစ်စေခြင်းအား နာနာက္ခဏိက ကမ္မ ပစ္စည်းဖြင့် ကျေးဇူးပြုနေသည်ဟု ဆိုရသည်။

၁။ ကုသလာကုသလံ ကမ္မံ - ကုသိုလ်၊ အကုသိုလ်ကံသည်
ဝိပါကာနံ ခန္ဓာနံ - အကျိုးဝိပါက်ခန္ဓာအား၎င်း၊
ကဋတ္တာ စ ရူပါနံ - ကမ္မဇရုပ်တို့အား၎င်း
ကမ္မပစ္စယေန ပစ္စယော - ပြုလုပ် အားထုတ်သည်ဖြစ်၍ (ကမ္မပစ္စည်းဖြင့်) ကျေးဇူးပြုသည်။

၂။ စေတနာ - စေ့ဆော်မှု စေတနာသည်၊
သမ္ပယုတ္တကာနံ ဓမ္မာနံ - ယှဉ်ဖက်တရားတို့အား၎င်း၊
တံ သမုဋ္ဌာနာနဉ္စ ရူပါနံ - ထိုယှဉ်ဖက်တရားတို့ကြောင့်ဖြစ်သော ရုပ်တို့အား၎င်း၊
ကမ္မပစ္စယေန ပစ္စယော - ပြုလုပ် အားထုတ်သည်ဖြစ်၍ (ကမ္မပစ္စည်းဖြင့်) ကျေးဇူးပြုသည်။


(မှတ်ချက်။ နာနာက္ခဏိက ကမ္မပစ္စည်းသည် ကုသိုလ်ကံ၊ အကုသိုလ်ကံတို့က နောင်တချိန်တွင် ၀ိပါက် စိတ်စေတသိက်နှင့် ကမ္မဇရုပ်များကို ကျေးဇူးပြုခြင်း ဖြစ်သည်။ သဟဇာတ ကမ္မပစ္စည်းသည်ကား ကုသိုလ် အကုသိုလ်ကံ စေတနာတို့သာမက၊ ၀ိပါက် ကြိယာ စေတနာတို့ကပါ အတူယှဉ်ဖက် နာမ်တရားတို့နှင့် ထိုနာမ်တရားတို့ကြောင့် ဖြစ်သော ရုပ်တရားတို့အား ကျေးဇူးပြုခြင်း ဖြစ်သည်။)

ဝိပါကပစ္စည်း



ဝိပါကပစ္စယောတိ -
၁။ ၀ိပါကာ စတ္တာရော ခန္ဓာ အရူပီနော အညမညံ ၀ိပါကပစ္စယေန ပစ္စယော။


ကုသိုလ် အကုသိုလ်ကံတို့ကြောင့် ဖြစ်ပေါ်လာသော အကျိုး စိတ်စေတသိက်တရားတို့အား ၀ိပါက် (၀ိပါက) ဟုခေါ်သည်။ ၀ိပါကဟူသည် တိုက်ရိုက်အားဖြင့် ရင့်ကျက်ခြင်း၊ရင့်မှည့်ခြင်းဟု အဓိပ္ပါယ် ရ၏။ မျိုးစေ့တစ်စေ့သည် တဖြည်းဖြည်း ရင့်ကျက်လာသောအခါ သီးကြ ပွင့်ကြသကဲ့သို့ ကံတရားတို့ ရင့်ကျက်၍ အကျိုးပေးခြင်းကို ဆိုလိုသည်။ ၀ိပါက်စိတ်တို့သည် နောက်ထပ် အကျိုးမပေးတော့။ ထို့ကြောင့် ၀ိပါက်စိတ်စေတသိက်တို့သည် ကံအနေအားဖြင့် နောင်တွင် အကျိုးပေးရန် စေ့ဆော် အားထုတ်မှု မရှိ။ ကြိယာစိတ်တို့ကဲ့သို့ ကိုယ်နှုတ်အမူအရာတို့ကို ဖြစ်စေရန်မျှလည်း အားထုတ်မှု မရှိ။ အားထုတ်မှု ပယောဂ ဗျာပါရများ လုံးဝကင်းဆိတ်နေ၍ ငြိမ်သက်သော သဘောရှိ၏။ ဤကဲ့သို့ ၀ိပါက် စိတ်စေတသိက်တို့သည် ပြုလုပ်အားထုတ်မှု ပယောဂ ဗျာပါရ ကင်းဆိတ်၍ ငြိမ်သက်သော သဘောဖြင့် အချင်းချင်း ကျေးဇူးပြုနေသည်ကို ၀ိပါကပစ္စည်း ဖြင့် ကျေးဇူးပြုသည် မည်၏။

၁။ ၀ိပါကာ - ၀ိပါက်အကျိုးတရားတို့သည်၊
စတ္တာရော ခန္ဓာ အရူပီနော - ရုပ်မဟုတ်သော နာမ်ခန္ဓာ လေးပါးအား
အညမညံ - အချင်းချင်း အပြန်အလှန်
ဝိပါကပစ္စယေန ပစ္စယော - ဗျာပါရကင်း၍ ငြိမ်သက်သည်ဖြစ်၍ (၀ိပါကပစ္စည်းဖြင့်) ကျေးဇူးပြုသည်။

စက္ခုဝိညာဏ်၊ သောတ၀ိညာဏ်၊ ဃာန၀ိညာဏ်၊ ဇိဝှာဝိညာဏ်၊ ကာယ၀ိညာဏ်ဟူသော အာရုံငါးပါးကို သိသည့် ပဉ္စ၀ိညာဏ်စိတ်များသည် ၀ိပါက်စိတ်များ ဖြစ်ကြ၏။ ကုသလ၀ိပါက်နှင့် အကုသလ၀ိပါက်ဟု နှစ်မျိုး ရှိသည့်အတွက် ဒွေးပဉ္စ၀ိညာဏ်စိတ်ဟုလည်း အဘိဓမ္မာကျမ်းစာများတွင် ဖော်ပြလေ့ရှိသည်။

ပဋိသန္ဓေစိတ်တို့သည်လည်း ၀ိပါက်စိတ်ပင် ဖြစ်၍ ကုသလ၀ိပါက်နှင့် အကုသလ၀ိပါက်ဟု နှစ်မျိုး ခွဲခြားနိုင်ပြန်၏။ အပါယ်ဘုံတို့တွင် အကုသလ၀ိပါက်စိတ်ဖြင့် ပဋိသန္ဓေယူ၍၊ သုဂတိဘုံတို့တွင် ကုသလ၀ိပါက်စိတ်ဖြင့် ပဋိသန္ဓေယူကြသည်။ ဘ၀တခု၏ နောက်ဆုံးကာလ ရောက်သောအခါတွင် တမလွန်ဘ၀သစ်ကို ဖြစ်စေမည့် ကံ၊ ထိုကံကို ပြုခဲ့စဉ်က အာရုံနိမိတ်၊ သို့မဟုတ် တမလွန်လားရာ ဂတိ၌ တွေ့ကြုံရမည့် အာရုံနိမိတ် တစ်မျိုးမျိုးသည်ထင်၍ သေခါနီးနောက်ဆုံး စိတ်အစဉ် (မရဏာသန္န၀ီထိ) ဖြစ်သည်။ မရဏာသန္န၀ီထိ စိတ်အစဉ်သည် စုတိစိတ်ဖြင့် အဆုံးသတ်၍ ဘ၀သစ်တွင် ပဋိသန္ဓေစိတ်ဖြစ်သည်။ ပဋိသန္ဓေစိတ်သည် မရဏာသန္န၀ီထိ စိတ်အစဉ်က ယူခဲ့သော ကံ၊ ကမ္မနိမိတ်၊ ဂတိနိမိတ် တစ်မျိုးမျိုးကိုပင် ဆက်၍ အာရုံပြု၏။ ပဋိသန္ဓေစိတ်နောက်မှစ၍ အခြားသော အာရုံသိစိတ်အစဉ် (၀ီထိစိတ်) တို့ ဖြစ်ပေါ်ခြင်း မရှိသောအခိုက်များတွင် ပဋိသန္ဓေစိတ် ယူခဲ့သော အာရုံကိုပင် အာရုံပြု၍ ပဋိသန္ဓေစိတ်နှင့် အလားတူဖြစ်သော ၀ိပါက်စိတ်များ ဖြစ်ပေါ်နေ၏။ ယင်းစိတ်များသည် ဘ၀ဖြစ်ဆဲကာလတွင် စိတ်အစဉ်တို့ ပြတ်မသွားစေရန် ဖြစ်ပေါ်နေကြခြင်းဖြစ်၍ ဘ၀င်စိတ် (ဘ၀င်္ဂ = ဘ၀ + အင်္ဂ = ဘ၀၏ အစိတ်အပိုင်းဖြစ်သော စိတ်) ဟုခေါ်သည်။ အိပ်မက်မြင်မက်ခြင်း မရှိဘဲ အိပ်မောကျနေသည်အခါတွင် ဤဘ၀င်စိတ်များ အဆက်မပြတ် ဖြစ်ပေါ်နေခြင်းပင်ဖြစ်၍ အလွန် ငြိမ်သက်သော သဘောရှိသည်။ အိပ်မောမကျသေးဘဲ အတွေးများဝင်နေ၊ အိပ်မက်များ မြင်မက်နေပါက စိတ်မငြိမ်သက်သေးဘဲ (ဘ၀င်မကျသေးဘဲ) စိတ်တို့ လှုပ်ရှား ယောက်ယက်ခတ်နေသည်ဟု ဆိုရ၏။

ဤသို့ ပဉ္စ၀ိညာဏ်စိတ်၊ ပဋိသန္ဓေစိတ်၊ ဘ၀င်စိတ်စသော ၀ိပါက်စိတ်များဖြစ်ခိုက်တွင် ယှဉ်ဖက်စိတ်စေတသိက်တို့ အချင်းချင်းအား ဗျာပါရကင်း၍ ငြိမ်သက်သည်ဖြစ်၍ ၀ိပါကပစ္စည်းဖြင့် ကျေးဇူးပြုနေကြသည်။ (ပစ္စယနိဒ္ဒေသတွင် ၀ိပါက်နာမ်ခန္ဓာ အချင်းချင်းအား ကျေးဇူးပြုခြင်းကိုသာ ဟောကြားထားသော်လည်း၊ ပဋ္ဌာန်း ကုသလတိက္က ပဉှာဝါရတွင် ၀ိပါက်တရားတို့နှင့် အတူဖြစ်ဖက် ရုပ်တရားတို့အားလည်း ကျေးဇူးပြုကြောင်း ဟောကြားထားပါသည်။)

ဆက်ရန် ...

ပဋ္ဌာန်း ပစ္စယနိဒ္ဒေသ မိတ်ဆက် - ၉ (ဈာနပစ္စည်း၊ မဂ္ဂပစ္စည်း)

ဈာနပစ္စည်း



ဈာနပစ္စယောတိ -
၁။ ဈာနင်္ဂါနိ ဈာနသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ ဈာနပစ္စယေန ပစ္စယော။


ဈာန (ဈာန်) ဟူသည် စူးစူးစိုက်စိုက် ကပ်၍ ရှုတတ်သော တရား (ဥပနိဇ္ဈာန) ဟု အဓိပ္ပါယ်ရသည်။ မြှားနှင့် ပစ်မှတ်အား တည့်အောင် ချိန်ရွယ်၍ ပစ်ခတ်သကဲ့သို့ အာရုံအား တည့်မတ်အောင် စူးစူးစိုက်စိုက် ချိန်ရွယ် ထိန်းချုပ်မှုမျိုးသည် ဈာန်မည်၏။ ဈာန်တရား၏ အစိတ်အပိုင်းဖြစ်သော ဈာန်အင်္ဂါ (ဈာနင်္ဂ) များသည် ထိုဈာန်နှင့် အတူဖြစ်ဖက် ရုပ်နာမ်များအား အာရုံ စူးစိုက်မှု စွမ်းအားဖြင့် ကျေးဇူးပြုခြင်းသည် ဈာနပစ္စည်းဖြင့် ကျေးဇူးပြုသည် မည်၏။

၁။ ဈာနင်္ဂါနိ - ဈာန်အင်္ဂါတို့သည်
ဈာနသမ္ပယုတ္တကာနံ ဓမ္မာနံ - ဈာန်နှင့် ယှဉ်သောတရားတို့အား(၎င်း)
တံ သမုဋ္ဌာနာနဉ္စ ရူပါနံ - ထိုတရားတို့ကြောင့် ဖြစ်သော ရုပ်တို့အား၎င်း
ဈာနပစ္စယေန ပစ္စယော - အာရုံ စူးစိုက်မှု စွမ်းအားဖြင့် (ဈာနပစ္စည်းဖြင့်) ကျေးဇူးပြုသည်။

သုတ္တန်ဒေသနာများတွင် ၀ိတက်၊ ၀ိစာရ၊ ပီတိ၊ သုခ၊ ဥပေက္ခာ၊ ဧကဂ္ဂတာတရားတို့ကို ဈာန်အင်္ဂါအဖြစ် ဟောကြားထား၏။ ပဋ္ဌာန်းဒေသနာတွင်မူ ကောင်းသော ကမ္မဋ္ဌာန်း နိမိတ်အာရုံများပေါ်တွင် စူးစိုက်မှုကိုသာမကဘဲ၊ မကောင်းသော အာရုံများပေါ်တွင် စူးစူးစိုက် ဖြစ်နေစေတတ်သော ၀ိတက်၊ ၀ိစာရ၊ ပီတိ၊ သောမနဿ၊ ဒေါမနဿ၊ ဥပေက္ခာ၊ ဧကဂ္ဂတာ ဟူသည့် တရား ၇-မျိုးလုံးအား ဈာန်အင်္ဂါ အဖြစ်ထည့်သွင်း သတ်မှတ်ထား၏။

ဝိတက် (၀ိတက္က)သည် စိတ်ကို အလိုရှိရာ အာရုံပေါ်သို့ ရောက်အောင် ကြံရွယ်ပေး၏ (ရှေးရှုတင်ပေး၏)။ ၀ိတက်က အစဦး တင်ပေးလိုက်သော အာရုံပေါ်တွင် တ၀ဲလည်လည် ဖြစ်နေရန် ကြံစည်ခြင်းသည် ၀ိစာရ မည်၏။ သုတ္တန်ဒေသနာများတွင် ၀ိတက္က၀ိစာရဟု တွဲ၍ ဟောလေ့ရှိသည်။ ပီတိသည် အာရုံကို နှစ်သက်စေ၏။ သောမနဿ ဒေါမနဿဥပေက္ခာဟူသော စေတသိကဝေဒနာများသည် အာရုံအား ၀မ်းမြောက်ခြင်း၊ စိတ်မသာယာခြင်း၊ ၀မ်းနည်း-၀မ်းသာမဖြစ်ဘဲ အညီအမျှရှိခြင်းဟူသော ခံစားမှုများနှင့် ခံစား၏။ ဧကဂ္ဂတာ (ဧက - တခုသော + အဂ္ဂ - အထွဋ်အဖျား + တာ - အဖြစ်) က စိတ်ကို တခုတည်းသော အာရုံတွင် တည်ငြိမ်နေစေရန် ထိမ်းပေးသော သမာဓိပင် ဖြစ်သည်။

ပထမဈာန်၊ ဒုတိယဈာန် စသဖြင့် ဈာန်စိတ်များ ဖြစ်နေချိန်တွင် ဈာန်အင်္ဂါတို့ အသီးသီး အထူး ပါဝင်ကြ၏။ ဈာန်စိတ်များ ဖြစ်နေချိန်မဟုတ်သော်လည်း ကာယကံ၊ ၀စီကံ၊ မနောကံတို့ဖြင့် ကောင်းမှု၊ မကောင်းမှုများ ပြုခိုက်တွင်လည်း ဈာန်အင်္ဂါတို့ ပါဝင်နေကြပါသည်။ အာရုံသိရုံ သက်သက်သာဖြစ်၍၊ အာရုံ စူးစိုက်မှုသဘော မရှိသည့် ပဉ္စ၀ိညာဏ်စိတ်များနှင့် ယှဉ်၍ဖြစ်သော ဥပေက္ခာ၊ ဧကဂ္ဂတာတို့ကိုမူ ဈာန်အင်္ဂါအဖြစ် သတ်မှတ်ခြင်း မပြုပါ။

မဂ္ဂပစ္စည်း



မဂ္ဂပစ္စယောတိ -
၁။ မဂ္ဂင်္ဂါနိ မဂ္ဂသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ မဂ္ဂပစ္စယေန ပစ္စယော။


“မဂ္ဂ” ဟူသောပုဒ်သည် “လမ်း” ဟု အနက်ရသည်။ အကောင်းဖက်တွင် သုဂတိဘုံများမှ စ၍ နိဗ္ဗာန်တိုင် ထွက်မြောက်စေနိုင်သော သမ္မာလမ်းနှင့် အဆိုးဖက်တွင် ဒုက္ခတိဘုံသို့ ပို့ဆောင်နိုင်သော မိစ္ဆာလမ်းဟု နှစ်မျိုး ရှိသည်။

သမ္မာဒိဋ္ဌိ၊ သမ္မာသင်္ကပ္ပ၊ သမ္မာဝါစာ၊ သမ္မာကမ္မန္တ၊ သမ္မာအာဇီဝ၊ သမ္မာဝါယာမ၊ သမ္မာသတိ၊ သမ္မာသမာဓိ ၈-ပါးတို့သည် သမ္မာမဂ္ဂင် ၈-ပါးမည်၏။ မိစ္ဆာမဂ္ဂင်အဖြစ် မိစ္ဆာဒိဋ္ဌိ၊ မိစ္ဆာသင်္ကပ္ပ၊ မိစ္ဆာဝါယာမ၊ မိစ္ဆာသမာဓိ ၄-မျိုးကို ဖော်ပြထား၏။ သုတ္တန်ဒေသနာများတွင် မိစ္ဆာဝါစာ၊ မိစ္ဆာကမ္မန္တ၊ မိစ္ဆာအာဇီဝ၊ မိစ္ဆာသတိတို့ကို ထည့်သွင်း ဟောကြားထားသော်လည်း၊ အဘိဓမ္မာဒေသနာတွင်မူ သီးခြားစေတသိက်များ အနေဖြင့် တရားကိုယ် ထုတ်ပြရန် မရှိသဖြင့် မိစ္ဆာမဂ္ဂင် စာရင်းတွင် ထည့်သွင်းထားခြင်း မရှိပါ။ ထိုမဂ္ဂင် ၁၂-ပါး တို့သည် အတူဖြစ်ဖက် ရုပ်နာမ်တရားတို့အား အကောင်း-အဆိုး ခရီးပန်းတိုင်တို့သို့ ရောက်စေရန် ပို့ဆောင်ပေးမည့် လမ်းသဖွယ် ကျေးဇူးပြုနေကြ၏။

၁။ မဂ္ဂင်္ဂါနိ - မဂ္ဂင်တရားတို့သည်
မဂ္ဂသမ္ပယုတ္တကာနံ ဓမ္မာနံ - မဂ်နှင့် ယှဉ်သောတရားတို့အား(၎င်း)
တံ သမုဋ္ဌာနာနဉ္စ ရူပါနံ - ထိုတရားတို့ကြောင့် ဖြစ်သော ရုပ်တို့အား၎င်း
မဂ္ဂပစ္စယေန ပစ္စယော - (အကောင်း အဆိုး) ထွက်မြောက်ရာ လမ်းအဖြစ် (မဂ္ဂပစ္စည်းဖြင့်) ကျေးဇူးပြုသည်။


ဆက်ရန် ...

Thursday, October 27, 2011

ပဋ္ဌာန်း ပစ္စယနိဒ္ဒေသ မိတ်ဆက် - ၈ (ဟေတုပစ္စည်း၊ အဓိပတိပစ္စည်း)

ဟေတုပစ္စည်း
ဟေတုပစ္စယောတိ -
၁။ ဟေတူ ဟေတုသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။


အဘိဓမ္မာဒေသနာအရ စိတ်စေသိက်တရားတို့အား ကုသိုလ်၊ အကုသိုလ်၊ အဗျာကတ ဟု အုပ်စုသုံးမျိုး ခွဲနိုင်၏။ တဖန် အဗျာကတ တရားတို့အားလည်း ၀ိပါက (၀ိပါက်) နှင့် ကြိယာဟု နှစ်မျိုး ထပ်ခွဲနိုင်ပြန်သည်။ ဤသို့ ကုသိုလ်၊ အကုသိုလ်၊ ၀ိပါက်၊  ကြိယာဟု လေးမျိုးခွဲခြား၍ လေ့လာခြင်းအား သဂြိုဟ်ကျမ်းတွင် အမျိုးဇာတ်ကို မူတည်၍ ခွဲခြားခြင်း (ဇာတိဘေဒ) ဟုခေါ်သည်။

ကုသိုလ်ဟူသည် အပြစ်ကင်း၍ ကောင်းသောအကျိုးပေးသည့်တရား (အန၀ဇ္ဇ သုခ ၀ိပါက)၊ အကုသိုလ်ဟူသည် အပြစ်ရှိ၍ မကောင်းသော အကျိုးပေးသည့်တရား (သာဝဇ္ဇ ဒုက္ခ ၀ိပါက) ဖြစ်သည်။ ကုသိုလ်၊ အကုသိုလ်တရားတို့သည် ကံအနေအားဖြင့် အကျိုးပေးစေနိုင်သော သတ္တိ (၀ိပါက လက္ခဏာ) ရှိ၏။ ကုသိုလ်ကံ၏ အကျိုးတရားတို့အား ကုသလ၀ိပါက်၊ အကုသိုလ်ကံ၏ အကျိုးတရားတို့အား အကုသလ၀ိပါက်ဟုခေါ်သည်။ ကုသလ၀ိပါက်၊ အကုသလ၀ိပါက်ဟူသော ၀ိပါက်တရားတို့သည် ကံအနေအားဖြင့် ထပ်မံ၍ အကျိုးပေးနိုင်စွမ်း မရှိတော့။ ကုသိုလ် အကုသိုလ်ဟု ဆို၍ မရ။ ထိုသို့ ကုသိုလ် အကုသိုလ်ဟု ဆို၍ မရသဖြင့် ၀ိပါက်တရားတို့သည် အဗျာကတတရား မည်၏။ ကြိယာစိတ်စေတသိက်တို့သည် ကံ၏ အကျိုးဝိပါက်များမဟုတ်ကြသည့်အပြင်၊ ကံသတ္တိ အနေအားဖြင့် အကျိုးပေးနိုင်စွမ်းမရှိ။ ကိစ္စတခုကို ဆောင်ရွက်ရန် အမူအရာမျှသာ ဖြစ်သည့် စိတ်စေတသိက်များ ဖြစ်သည်။

ဤတွင် အကုသိုလ်တရားတို့ ဖြစ်ရသည့် အရင်းမူလသည် တပ်မက်ခြင်း (လောဘ)၊ အမျက်ထွက်ခြင်း (ဒေါသ)၊ တွေဝေခြင်း (မောဟ) တရား သုံးပါးကြောင့် ဖြစ်၏။ ထို့အတူပင် ကုသိုလ်တရားတို့ ဖြစ်ရသည့် အရင်းမူလသည် တပ်မက်မှုကင်းခြင်း (အလောဘ)၊ အမျက်ကင်းခြင်း (အဒေါသ)၊ တွေဝေမှုကင်းခြင်း (အမောဟ) တရားသုံးပါးတို့ကြောင့် ဖြစ်သည်။ ဤ တရား ၆-ပါးတို့အား ဟိတ် ၆-ပါး (ဟေတု) ဟုလည်း ခေါ်သည်။ ဟိတ်ဟူသော စကားသည်လည်း အခြေခံ အရင်း အမြစ် မူလဟူသော အဓိပ္ပါယ်ရ၏။ သစ်ပင်တစ်ပင် ရှင်သန် ကြီးပွား တည်တံ့စေရန် အတွက် ရေသောက်မြစ်က ထောက်ပံ့ပေးထားသကဲ့သို့၊ ဤ ဟိတ် ၆-ပါးတရားတို့က ရုပ်နာမ်တရားတို့ကို စည်ပင် ပြန့်ပွား တည်တံ့စေရန် အထောက် အပံ့ပေး၏။ ရေသောက်မြစ် အခိုင်အခံ့ မရှိသော ရေညှိ ရေမှော်တို့သည် ကောင်းစွာ တည်တံ့ခြင်း မရှိသကဲ့သို့ ဟိတ်တရားတို့၏ အထောက်အပံ့ကင်းသော ရုပ်နာမ်တရားတို့သည် ကောင်းစွာ တည်တံ့နိုင်ခြင်း မရှိကြပေ။

ကုသိုလ်တရားတို့သည် အလောဘ၊ အဒေါသ၊ အမောဟဟူသည့် ကုသလဟိတ်တို့၏ အထောက်အပံ့ရကြသည်။ အကုသိုလ်တရားတို့သည် လောဘ၊ ဒေါသ၊ မောဟဟူသည့် အကုသလဟိတ်တို့၏ အထောက်အပံရကြသည်။ ဟိတ်တရားတို့၏ အထောက်အပံ့ကို ရသည့် စိတ်စေတသိက်တို့သည် သဟိတ်တရားများ (သဟေတုက) မည်၏။ အချို့သော ၀ိပါက်နှင့် ကြိယာတရားတို့သည် အလောဘ၊ အဒေါသ၊ အမောဟဟူသည့် (အဗျာကတ) ဟိတ်တရားတို့၏ အထောက်အပံရသော သဟိတ်တရားများဖြစ်၍၊ အချို့သော ၀ိပါက်နှင့် ကြိယာတရားတို့သည်ကား မည်သည့်ဟိတ်တရားတို့၏ အထောက်အပံ့ကိုမျှ မရသည့် အဟိတ်တရားများ (အဟေတုက) ဖြစ်ကြသည်။ ဟိတ်တရားတို့က မိမိတို့နှင့် အတူယှဉ်ဖက်ဖြစ်သော သဟိတ် စိတ်စေတသိက်များနှင့် အတူဖြစ်ဖက် ရုပ်တရားတို့အား ကောင်းစွာ တည်တံ့ စည်ပင်နိုင်စေရန် ထောက်ပံ့နေခြင်းကို ဟေတုပစ္စည်းဖြင့် ကျေးဇူးပြုသည်ဟု ခေါ်သည်။ အဟိတ် စိတ်စေတသိက်တရားတို့သည် ဟေတုပစ္စည်းဖြင့် ကျေးဇူးပြုခြင်း မခံရသဖြင့် အလွန် အင်အားနည်းကြ၏။


၁။ ဟေတူ -
ဟိတ် ၆-ပါးတို့သည်
    ဟေတုသမ္ပယုတ္တကာနံ ဓမ္မာနံ -
ဟိတ်နှင့် ယှဉ်သောတရားတို့အား(၎င်း)
    တံ သမုဋ္ဌာနာနဉ္စ ရူပါနံ -
ထိုတရားတို့ကြောင့် ဖြစ်သော ရုပ်တို့အား၎င်း
  ဟေတုပစ္စယေန ပစ္စယော -
မူလရင်းမြစ်အားဖြင့် ကောင်းစွာတည်တံ့စေ၍ (ဟေတုပစ္စည်းဖြင့်) ကျေးဇူးပြုသည်။




(မှတ်ချက်။ ဟိတ်တရားတို့ကြောင့် ကုသိုလ်၊ အကုသိုလ် ဖြစ်ခြင်းမျှအား ဟေတုပစ္စည်းဖြင့် ကျေးဇူးပြုခြင်းဟု အဓိပ္ပါယ် မကောက်ယူရပါ။ ၀ိပါက်၊ ကြိယာနှင့် ရုပ်တရားဟူသော ကုသိုလ်၊ အကုသိုလ်မဟုတ်သည့် အဗျာကတတရားများသည်လည်း ဟေတုပစ္စည်း၏ ကျေးဇူးပြုခြင်း ခံကြရပါသည်။ ဟိတ်တရားတို့သည် ရေသောက်မြစ်သဖွယ် အတူဖြစ်ဖက် ရုပ်နာမ်တရားတို့အား ကောင်းစွာတည်တံ့ရန်၊ စည်ပင်ပြန့်ပွားနိုင်စေရန် ကျေးဇူးပြုခြင်းအား ဟေတုပစ္စည်းဖြင့် ကျေးဇူးပြုသည်ဟု အဓိပ္ပါယ်ကောက်ယူရသည်။)

အဓိပတိပစ္စည်း
အဓိပတိပစ္စယောတိ -
၁။ ဆန္ဒာဓိပတိ ဆန္ဒသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။
၂။ ၀ီရိယာဓိပတိ ၀ီရိယာသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။
၃။ စိတ္တာဓိပတိ စိတ္တသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။
၎။ ၀ီမံသာဓိပတိ ၀ီမံသာသမ္ပယုတ္တကာနံ ဓမ္မာနံ တံ သမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော။
၅။ ယံ ယံ ဓမ္မံ ဂရုံ ကတွာ ယေ ယေ ဓမ္မာ ဥပ္ပဇ္ဇန္တိ စိတ္တစေတသိကာ ဓမ္မာ၊ တေ တေ ဓမ္မာ တေသံ တေသံ ဓမ္မာနံ အဓိပတိပစ္စယေန ပစ္စယော။


အဓိပတိဟူသည် အကြီးအကဲ ခေါင်းဆောင်ဟု အဓိပ္ပါယ်ရသည်။ စိတ်စေတသိက် တစ်ခုခု၊ အာရုံ တပါးပါးသည် အလွန်အင်အား ကောင်းလာသောအခါတွင် အခြားသော နာမ်တရား ရုပ်တရားတို့အား ဦးဆောင် လွှမ်းမိုးသွားခြင်းကို အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်ဟု ဆိုရ၏။

၁။ စွမ်းအားကောင်းသော စိတ်စေတသိက်တရားတို့က ယင်းတို့နှင့် ယှဉ်ဖက် သမ္ပယုတ်တရားတို့နှင့် စိတ္တဇရုပ်တို့အား အကြီးအမှူးအဖြစ် ကျေးဇူးပြုသော သဟဇာတာဓိပတိ ပစ္စည်း
၂။ အင်အားကောင်းသော အာရုံတို့က စိတ်စေတသိက်တရားတို့အား အကြီးအမှူးအဖြစ် ကျေးဇူးပြုသော အာရမ္မဏာဓိပတိ ပစ္စည်းဟု နှစ်မျိုးရှိသည်။

သဟဇာတာဓိပတိတပ်နိုင်သော စိတ်စေတသိက်များဆိုရာတွင် (၁) ပြင်းပြသော ဆန္ဒ (၂) မဆုတ်နစ်သော ၀ီရိယ (၃) တက်ကြွသော စိတ်ဓာတ်နှင့် (၄) ထက်မြက်သော ပညာ (၀ီမံသ) တို့ဖြစ်သည်။ ဤ ဆန္ဒ၊ ၀ီရိယ၊ စိတ္တ၊ ၀ီမံသဟူသော တရားလေးပါးအား ဣဒ္ဓိပါဒ (ပြီးမြောက် အောင်မြင်ခြင်း၏ အခြေခံ အကြောင်းတရား) လေးပါးအဖြစ် ဖော်ပြလေ့ရှိသည်။ ထိုတရားလေးပါးအနက် တရားတစ်ပါးပါးက စွမ်းအား ထက်သန်လာသည့်အခါတွင် ယှဉ်ဖက်နာမ်တရားများနှင့် အတူဖြစ်ဖက် ရုပ်တရားတို့အား အကြီးအမှူးအဖြစ် သဟဇာတာဓိပတိ ပစ္စည်းဖြင့် ကျေးဇူးပြုသည်။


၁။ ဆန္ဒာဓိပတိ -
အကြီးအမှူးဖြစ်သော ဆန္ဒသည်
    ဆန္ဒသမ္ပယုတ္တကာနံ ဓမ္မာနံ -
ဆန္ဒနှင့် ယှဉ်ဖက် တရားတို့အား(၎င်း)
    တံ သမုဋ္ဌာနာနဉ္စ ရူပါနံ -
ထိုတရားကြောင့် ဖြစ်သော ရုပ်တို့အား၎င်း
    အဓိပတိပစ္စယေန ပစ္စယော -
အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်။
၂။ ၀ီရိယာဓိပတိ -
အကြီးအမှူးဖြစ်သော ၀ီရိယသည်
    ၀ီရိယာသမ္ပယုတ္တကာနံ ဓမ္မာနံ -
ဝီရိယနှင့် ယှဉ်ဖက် တရားတို့အား(၎င်း)
    တံ သမုဋ္ဌာနာနဉ္စ ရူပါနံ -
ထိုတရားကြောင့် ဖြစ်သော ရုပ်တို့အား၎င်း
    အဓိပတိပစ္စယေန ပစ္စယော -
အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်။
၃။ စိတ္တာဓိပတိ -
အကြီးအမှူးဖြစ်သော စိတ်သည်
    စိတ္တသမ္ပယုတ္တကာနံ ဓမ္မာနံ -
စိတ်နှင့် ယှဉ်ဖက် တရားတို့အား(၎င်း)
    တံ သမုဋ္ဌာနာနဉ္စ ရူပါနံ -
ထိုတရားကြောင့် ဖြစ်သော ရုပ်တို့အား၎င်း
    အဓိပတိပစ္စယေန ပစ္စယော -
အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်။
၎။ ၀ီမံသာဓိပတိ -
အကြီးအမှူးဖြစ်သော ပညာသည်
    ၀ီမံသာသမ္ပယုတ္တကာနံ ဓမ္မာနံ -
ပညာနှင့် ယှဉ်ဖက် တရားတို့အား(၎င်း)
    တံ သမုဋ္ဌာနာနဉ္စ ရူပါနံ -
ထိုတရားကြောင့် ဖြစ်သော ရုပ်တို့အား၎င်း
    အဓိပတိပစ္စယေန ပစ္စယော -
အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်။

ထို့အတူပင် အလွန်နှစ်လိုဖွယ်ရာ အာရုံ၊ ဈာန်နိမိတ်၊ နိဗ္ဗာန်စသော အာရုံတို့သည် အလွန်လေးနက် အင်အားကောင်းသည်ဖြစ်၍ သက်ဆိုင်ရာ လောဘစိတ်၊ ဈာန်စိတ်၊ မဂ်စိတ်၊ ဖိုလ်စိတ် စသည်တို့အား အကြီးအမှူးအဖြစ် အာရမ္မဏာဓိပတိ ပစ္စည်းဖြင့် ကျေးဇူးပြုပါသည်။

၅။ ယံ ယံ ဓမ္မံ - အကြင်ကြင်သော (အာရုံ) တရားတို့အား
    ဂရုံ ကတွာ - အလေးဂရု အာရုံပြု၍
    ယေ ယေ ဓမ္မာ ဥပ္ပဇ္ဇန္တိ စိတ္တစေတသိကာ ဓမ္မာ - အကြင် စိတ်စေတသိက်တရားတို့ ဖြစ်ကြ၏။
    တေ တေ ဓမ္မာ - ထိုထို (အာရုံ) တရားတို့သည်၊
    တေသံ တေသံ ဓမ္မာနံ - ထိုထို (စိတ်စေတသိက်) တရားတို့အား
    အဓိပတိပစ္စယေန ပစ္စယော - အကြီးအမှူးအဖြစ် (အဓိပတိပစ္စည်းဖြင့်) ကျေးဇူးပြုသည်။


ဆက်ရန် ...

Monday, October 24, 2011

နေ၀င်ချိန် အိပ်တန်းဝယ်…

အချိန်ဇယားအရ တနေ့တာ အားထုတ်ရမည့် လုပ်ငန်းတာဝန်ကုန်ဆုံးလို့ အိပ်ယာဝင် အနားယူဖို့ အချိန်ရောက်ခဲ့ပြီ။ မိမိအတွက် နေရာချထားပေးသော အိပ်ယာနေရာတွင် အရံသင့်ခင်းထားပြီးသော ခပ်ပါးပါး မွေ့ယာလေးမှာ မဖြစ်မနေ ကျနော် ကျောခင်းရပေတော့မည်။ စိတ်ရဲ့ ပင်ကိုယ် သဘာဝ ဟာ ကြည်လင်တောက်ပနေတယ်.. လို့ ဆရာတော်ကတော့ ဟောလိုက်တာပဲ။ ကျနော့်ရဲ့ စိတ်တွေကတော့ ဆောက်တည်ရာ မရပါဘူး။ လူတိုင်းမှာ အားငယ်တတ်တဲ့ စိတ်အခံလေးတော့ ရှိကြမယ် လို့ ကျနော်တွေးထင်နေမိတယ်။ စိတ်အကြောင်းလည်း တခါမှ မလေ့လာဖူးပါဘူး။ အခုတော့ ကိုယ့်စိတ်ကိုယ် မသိ သိအောင်ကို လုပ်ရမည့် အခြေရောက်နေပါပြီ။ ကျနော်က ရိပ်သာတခုမှာ တရားအားထုတ်ဖို့ ရောက်နေခဲ့ပြီလေ…။
*****
လူတွေမှာ အထူးသဖြင့် ငယ်စဉ်ဘ၀မှာပေါ့လေ… ဆင်းရဲလို့၊ ရုပ်ဆိုးလို့၊ မိဘဆွေမျိုးဂုဏ် နိမ့်လို့၊ ကျန်းမာရေး မကောင်းလို့၊ စာညံ့လို့…စတဲ့ အချက်တွေပေါ် မူတည်ပြီး ကလေးတွေမှာ စိတ်ဒဏ်ရာတွေ ရတတ်ကြတယ်။ ပြောပလောက်တဲ့ အခြေအနေတွေမဟုတ်ပဲ၊ သာမန် အသေးအဖွဲကိစ္စတွေက ထပ်ဖန်တလဲလဲ ဖြစ်လာပြန်ရင်လည်း အားငယ်တဲ့ စိတ်တွေ ၀င်သွားတတ်ကြသေးတယ်… လို့ ကျနော် ကြားဖူးနားဝ ရှိပါတယ်။

ကျနော်ရဲ့ ငယ်စဉ်ဘ၀၊ ဘ၀ပေး အခြေအနေကတော့ အတော်လေး သာသာယာယာ ရှိပါတယ်။ မယ်မယ်ရရ ဘာ အစွန်းအထင်းမှ မရှိခဲ့ပါဘူး။ ဖေဖေ ဆုံးတော့ ကျနော် ၁၅နှစ်သား ရှိပါပြီ။ ဖေဖေ့လက်ငုတ်လက်ရင်း ဆန်ဆိုင်ကို မေမေက ဟန်မပျက် ဆက်လက် လုပ်ကိုင်ပါတယ်။ ဖေဖေရှိကတည်းက သွန်သင်ဆုံးမခဲ့လို့ ကျနော် စီးပွားရေးကိုလည်း ၀ါသနာပါပါတယ်။ ပညာရေးမှာလည်း မညံ့ပါဘူး။ မေမေ့ ဆန်ဆိုင်မှာ ကောင်းကောင်းအကူအညီ ပေးနိုင်ခဲ့ပါတယ်။ တခုတော့ ရှိတယ် ဆန်ဆိုင်ဆိုတော့ အလေးအပင်တွေတော့ မ ရတာပေါ့ဗျာ။ အရောင်းအ၀ယ်က ကောင်းနေတော့လည်း ပင်ပန်းတယ်လို့ မထင်ခဲ့ပါဘူး။ မေမေ့ကို ကူညီနိုင်တဲ့ သားလိမ္မာအဖြစ်ကို ရလို့ ၀မ်းသာရပါတယ်။

ဆယ်တန်း စာမေးပွဲကြီး ဖြေပြီး ကျောင်းပိတ်ရက် မေမေ့ ဆန်ဆိုင်မှာ ကူနေတုန်း တနေ့မှာတော့ မေမေက “ဟဲ့သား… လာစမ်း လာစမ်း ဒီနား လာစမ်း” ဆိုပြီး ကျနော့်ကို အလန့်တကြား လှမ်းခေါ်တယ်။ ကျနော် မေမေ့နား ရောက်သွားတော့ “ဟိုဘက်လှည့်စမ်း” ဆိုလို့ မေမေ့ကို ကျောပေးလိုက်တော့၊ ကျနော့် ကျောပြင်ကို လက်နဲ့ နေရာအနှံ့ လိုက်စမ်းတယ်။ ဟိုနားနှိပ်လိုက် ဒီနားနှိပ်လိုက်နဲ့ ဖိကြည့်ပြီး… “နာလား… နာလား” လို့လည်း မေးတယ်…။ ကျနော်ကလည်း “မနာပါဘူး မေမေရဲ့ … ဘာဖြစ်လို့လဲ” လို့ မေးမှ… “ငါ့သား ကျောပြင် ဘယ်နဲ့ ညာ မညီတော့ဘူး… ညာဘက်က ခုံးထွက်နေတယ်” လို့ ပြောပါတယ်။ ဒီတော့မှ ကျနော်လည်း ရေချိုးခန်းထဲဝင် မှန်အသေအချာ ကြည့်မိတော့မှ ကျနော်ရဲ့ ညာဘက် ပခုံးက နိမ့်ကျနေခဲ့ပြီး၊ ညာဘက်လက်ပြင်က ငေါထွက်နေတာ တွေ့ရပါတော့တယ်။ စိတ်မျက်စိထဲမယ် ကျောမှာ ဘုကြီးနဲ့ ခါးကုံးကြီးရဲ့ပုံ ထင်လာပြီး… ကျနော် စိတ်ကလေးပါ နိမ့်ကျသွားသလို ခံစားမိတယ်…။

အဲ့ဒီည.. မေမေက ကျနော့်အိပ်ယာပေါ် တယောက်အိပ်မွေ့ယာလေးတခု လာခင်းပေးတယ်။ ကျနော် ငယ်ငယ်က အိပ်ယာထဲ သေးပေါက်တတ်လို့ မွေ့ယာနဲ့ မအိပ်ရဘူး ခင်ဗျ။ နောက်အရွယ်ရောက်လာတော့လည်း ဒီအတိုင်း ကြမ်းပြင်ပေါ် သင်ဖျူးးလေးခင်းပြီး ရိုးရိုးရှင်းရှင်း အိပ်ရတာကို နှစ်သက်နေမိလို့၊ မွေ့ယာနဲ့ အိပ်ချင်တယ်လို့လည်း မေမေ့ကို တခါမှ မပူဆာဖြစ်ခဲ့ဘူး။ အဲ့မေမေခင်းပေးတဲ့ မွေ့ယာလေး ပေါ်မှာလည်း ကျနော် ဟန်ကျပန်ကျ သေသေချာချာ မအိပ်ခဲ့ရပါဘူး။ မညီညာတော့တဲ့ ကျနော့်ကျောပြင်မှာ နိမ့်ဆင်းနေတဲ့ဖက်အတွက် မွေ့ယာလေးဟာ မွေ့ယာမမည်တော့ပဲ အခုအခံတခုသာ ဖြစ်နေတာ မေမေ့ကို မသိစေခဲ့တော့ပါဘူး။

နောက်မေမေက ကျနော့်ကို ဆေးခန်းပြပေးပါတယ်။ အရိုးအထူးကု ဆရာဝန်ကြီးက ကျနော့်ကို ကုသမှုခံယူဖို့ သူတာဝန်ကျရာ မသန်မစွမ်းဆေးရုံကို လာခဲ့ဖို့ ပြောတယ်။ ဆန်အိတ်တွေကို ဟောသည်လို ဟောသည်လို သယ်မ နေတဲ့ ကျနော့်ကို မသန်မစွမ်း ဆေးရုံကို လာဖို့ ခေါ်တော့ တမျိုးကြီးပဲဗျ။ ဒါပေမဲ့ လိုအပ်ရင်.. ရောဂါရယ်လို့ ဖြစ်လာရင် စိတ်ရောဂါကု ဆေးရုံကိုတောင် သွားသင့် သွားရသေးတာပဲဗျာ။ မသန်မစွမ်း ဆိုတော့လည်း ဘာတတ်နိုင်မလဲ သွားရတာပ…။ ကျနော်က မေမေ့ အဆုံးအမအောက်မှာ နူးညံ့ပျော့ပျောင်းတဲ့ စိတ်နှလုံးသားရှိသူလို့ ကိုယ့်ကိုကိုယ်တော့ ထင်တာပဲ။ နောက်ပြီး ဆေးရုံက သမိုင်းမှာ ဆိုတော့ ကျနော် တက်နေတဲ့ စက်မှုတက္ကသိုလ်ရှိရာ အင်းစိန်နဲ့ ဘာဝေးလို့လဲ…။ ဆေးရုံသွားရင် ကျနော့် သူငယ်ချင်းတွေ အဖေါ်လိုက်ပေးလို့ မေမေတောင် သက်သာသေး။

တခု မကောင်းတာကတော့… အစအနောက်သန်ရာမှာ နာမည်ကြီးတဲ့ စက်မှုတက္ကသိုလ် ကျောင်းတော်သား ကျနော့်သူငယ်ချင်းတွေက ကျနော့်ကို ဂျော့ဘု လို့ ခေါ်ကြတယ်ဗျ…။ အမေရိကန်သမ္မတတော့ မဟုတ်ဘူးဗျို့… ကျောက ဘုနေလို့ ကျောဘု … ဂျော့ဘု လို့ ခေါ်ကြတာ…။ ကောင်မလေးတွေရှေ့ အခေါ်ခံထိရင်တော့ ရှက်သလိုလိုပဲဗျာ။ ဒါပေမဲ့ အရေးမကြီးပါဘူး။ ကျနော်မှ ရင်မခုန်တတ်သေးတာ။ နောက်ပြီး ကျောက ဘုကလည်း အင်္ကျီ ပွပွ ၀တ်ထားရင် မသိသာလှပါဘူး။ တနေကုန် သွားလာလှုပ်ရှား… စာကြည့်ချိန်မှာ ကြာမြင့်စွာ စာထိုင်ကြည့်ထားမိတာတွေက ည အိပ်ယာဝင်မှသာ ဒုက္ခပေးတာ…။ ကျနော့် ကျောရိုးက ကောက်နေတာလား… ကော့နေတာလား… ဘာလိုကြီး ဖြစ်နေတာလဲတော့ မသိဘူးဗျား… အောင်မလေး အမလေး တ ပြီးမှာ ကျောခင်းလို့ရတာပါ။ မေမေက ဦးစိုင်း… မိဂသီ တိုင်းရင်းဆေးတွေ ကျနော် စာဖတ်နေချိန် နောက်ကျောကို လာလာလိမ်းပေးရှာတယ်…။ ကျနော့်အိမ်မှာ ဦးစိုင်းအကြောပြေ ဒဏ်ကြေလိမ်းဆေးကို တိုင်ကီနဲ့ ဆောင်ထားရမတတ်ပါပဲဗျာ။

မြွေလိုတွားသွား၊ ယုန်လိုခုန် အစရှိတဲ့ ကိုယ့်အားကိုယ်ကိုးပြီး လုပ်ရတဲ့ လေ့ကျင့်ခန်းတွေနဲ့ Physiotherapy လို့ ခေါ်တဲ့ ကုထုံးကြီးကို စိတ်မရှည်ချင်တော့တဲ့ ကျနော်က ဆရာဝန်ကြီးကို ဆွေးနွေးကြည့်တယ်။ “ဆရာရယ် အမြန်ပျောက်နိုင်တဲ့ ကုထုံးလေးများရှိလေသလား” လို့ပါ။ အမြန်ပျောက်နိုင်တဲ့ ကုနည်းကတော့ ခွဲစိတ်ခြင်းပဲတဲ့၊ ဒါပေမဲ့ အဲ့ဒီအချိန် မြန်မာပြည်မှာ ပေးနိုင်တဲ့ ဆေးရုံဆေးခန်းသုံး ပစ္စည်းကိရိယာ အခြေအနေတွေကြောင့် စွန့်စားမှု ကြီးလေးတဲ့ ဒီကုထုံးကို ဆရာကြီးက အားမပေးခဲ့ပါဘူး။ ဒီလိုနဲ့ ကျနော်လည်း ဂျော့ဘု က ဂျော့ဘု …။ ကျောက ဘုက မပျောက်နိုင်သေးပဲ၊ ရင်ထဲမှာ အဖုတခု ရလာပြန်တယ်။

ကျနော့် ကျောက ဘုကတော့ Scoliosis လို့ ခေါ်ပြီး၊ ရင်ထဲက ဘုလေးကတော့ စုလေးဝေ လို့ခေါ်တယ်။ ကျောပေါ်က ဘု ဘယ်အချိန်က စထွက်နေမှန်းမသိသလို၊ ရင်ဘတ်ထဲက အဖု ဘယ်အချိန်က စ ၀င်နေမှန်းလည်း မသိခဲ့ပါဘူး။ စုလေးဝေ က ကျနော့်တို့ အတန်းထဲကပါပဲ။ စာသင်ချိန် အတန်းထဲမှာ သူ့ပုံလေးတွေ ပန်းချီထိုင်ဆွဲတယ်။ သူနားမလည်တဲ့ စာတွေ ရှင်းပြတယ်။ အချစ်စစ်တခုကို ဖွင့်ဟဖို့ ကျနော့်မှာ ဘာမှ သိမ်ငယ်စရာ အကြောင်း မရှိပါဘူး။ ဒါပေမဲ့လည်း ကျနော် လွယ်လွယ်နဲ့ ဖွင့်မပြောခဲ့ပါဘူး။ ဆရာဝန်ကြီးကို အယင် တိုင်ပင်တယ် “ကျနော့်ရောဂါဟာ အိမ်ထောင်ပြုရင် သားသမီးရဖို့ အခက်အခဲ ရှိနိုင်ပါသလား” လို့…။ “ဘာပြဿနာမှ မရှိနိုင်ဘူး” ဆိုတဲ့ ဆရာဝန်ကြီးရဲ့ အဖြေစကားကြားမှ စုလေးဝေ ကို ဖွင့်ပြောခဲ့တာပါ။ စုလေးကလည်း “သူ့ကို စာတော်လို့ သိလား” ဆိုတဲ့ မပွင့်တပွင့်လေသံလေးနဲ့ တုန့်ပြန်ခဲ့ပါတယ်။ စုလေးဝေ ကို တဘ၀လုံးစာ ကျနော် ရည်ရွယ်ခဲ့တာပါ။

ကျောင်းပြီးလို့ လုပ်ငန်းခွင် အသီးသီးဝင်ပြီး၊ နှစ်နှစ်အကြာမှာ စုလေးနဲ့ ကျနော် လက်ထပ်ခဲ့တယ်။ ဒီနေရာမှာတော့ နားနဲ့ မနာ ဖ၀ါးနဲ့ နာပါဗျာ။ ကျနော်တို့ရဲ့ မင်္ဂလာဦး ခန်းဝင်ပစ္စည်းတခုဖြစ်တဲ့ အိပ်ယာကုတင်က နှစ်ယောက်အိပ် မွေ့ယာကြီးဟာ အင်မတန် အိစက်ညက်ညောပါတယ်။ အိပ်ယာဝင်ခါနီး ကျနော့်ကျောကို ဒဏ်ကြေဆေး လိမ်းပေးရတဲ့ တာဝန်ကို မေမေဆီကနေ စုလေးက လွှဲပြောင်းယူတယ်။ စုလေးကလည်း ရက်ရှည် လများ မငြီးမငြူ ကြင်ကြင်နာနာ လိမ်းပေးခဲ့တာပါပဲ။ ကျနော့်မှာသာ စုလေးကို အားနာတဲ့စိတ်၊ ကိုယ့်ကိုကိုယ် အားငယ်တဲ့စိတ်တွေနဲ့ ဒီဘုကြီး ဆက်လက်ကြီးထွားမလာပါစေနဲ့လို့ ကြိတ်ဆုတောင်းရတာ အမောပါပဲ။ ခင်များတို့ စိတ်မကောင်းတော့ မဖြစ်ကြနဲ့ဗျာ။ ကျနော်နဲ့စုလေးမှာ ရင်သွေးရတနာ မထွန်းကားခဲ့ပါဘူး။ ကျနော့်အပြစ်လား။ စုလေး အပြစ်လား။ အခြေအနေနဲ့ အကြောင်းအပေါင်းတွေ မစုံလို့လားဆိုတာတော့ ကျနော်တို့ အားလုံး မသိနိုင်ပါဘူး။

တဦးတည်းသော သားဖြစ်တဲ့ ကျနော်နဲ့ တဦးတည်းသော သမီး ဖြစ်တဲ့ စုလေးတို့ရဲ့ မျိုးဆက်သစ်ဆိုတာက မျှော်လေဝေးဝေး ဖြစ်ခဲ့ပါတယ်။ နောက်ဆုံးတော့ ဆွေနီးမျိုးစပ် ထဲက ကလေးတယောက်ကို ကျွေးမွေး စောင့်ရှောက် ပညာသင်ပေးခဲ့တယ်။ မွေးစားသားရယ် ဘာရယ်လိုတော့ တရားဝင် မဟုတ်ပါဘူး။ စုလေးဟာ ကျနော်ထင်ထားတာထက် အများကြီး တည်ငြိမ် ရင့်ကျက်တဲ့ အမျိုးသမီးပါ။ စုလေး.. ရင်သား ကင်ဆာနဲ့ ဆုံးတော့ အသက် လေးဆယ်... အင်း... လေးဆယ်ပဲ ရှိသေးတယ်။ ကျနော်သာ အရိုးကင်ဆာနဲ့ သေသင့်တာလို့ ရူးရူးမိုက်မိုက် တွေးမိပါတယ်ဗျာ။ နောက်တော့ နှစ်ယောက်အိပ် မွေ့ယာကြီးမှာ ကျနော် တယောက်ထဲ… စုလေး မရှိတော့ပေမဲ့… သူ့ ခေါင်းအုံးလေးကို ကျနော် ဖယ်မပစ်ပါဘူး…ဒီအတိုင်းလေး ထားတယ်။ ကျနော့်ကျောကလည်း နာတယ်။ ရင်ထဲကလည်း နာတယ်ဗျာ။

ကျနော် အလုပ်တာဝန်နဲ့ ပြည်တွင်း ပြည်ပ နေရာအနှံ ခရီး အတို အရှည်တွေ သွားခဲ့ရဖူးတယ်။ တည်းခိုခဲ့တဲ့ ဟော်တယ်တွေ၊ တည်းခိုခန်းတွေက သန့်ရှင်းရေး အလုပ်သမားတွေကတော့ သက်သာကြပေမယ်။ ကျနော့် အိပ်ယာက မတွန့်မကြေပဲကိုး။ မတွန့်မကြေဆို ကျနော်က မွေ့ယာပေါ်မှာမှ ကျောမခင်းတော့ပဲကိုဗျ။ နောက်တော့ သတ္တ၀ါတွေကို ကျနော့် ကျောရိုးလို တွန့်မနေ၊ ကျနော့် နှလုံးသားတွေလို ကြေမနေပါစေနဲ့ လို့ သွားရင်းလာရင်း မေတ္တာပို့တတ်တဲ့ အလေ့အထလေး ရလာတယ်။ ကြာတော့ တိုက်ဆိုင်မှုတွေ၊ အမှတ်တရတွေ၊ အတိတ်နမိတ်တွေကိုပဲ အလေးဂရုပြုပြီး ရှင်သန်နေမိတဲ့ ကျနော့်ဘ၀ကြီးကို ကျနော်ကိုယ်တိုင် ငြီးငွေ့လာတယ်။ အခုတော့ မေတ္တာ ဘာဝနာက တဆင့်တက်လို့ ၀ိပဿနာ ဘာဝနာ ပွားများတတ်အောင် လေ့ကျင့်သင်ကြားဖို့ ဒီနေရာကို ရောက်နေပြီပေါ့ဗျာ…။
*****
မွေ့ယာသစ်လေးပေါ် လဲလှောင်းဖို့ ကျနော့်ခန္ဓာကိုယ်ကို လှဲချလိုက်ချိန်မှာ ကျနော် ဉာဏ်ထဲ အသိတခု လင်းလက်ဖြာသွားတယ်။ ဟုတ်တယ် ကျနော် ငယ်ငယ်က မသိမိုက်မှားစွာ ကိုယ့်ခန္ဓာကိုယ်ရဲ့ ခံနိုင်စွမ်းကို မချင့်ချိန် သတိမမူပဲ… မနိုင်တဲ့ ၀န်တွေ ထမ်းခဲ့လို့ တဘ၀လုံးစာ အနာရောဂါ ရခဲ့တယ်…။ ဒီလိုပဲ ကျနော့်ရဲ့ စိတ်မှာလည်း လွမ်းဆွတ်မှုတွေ၊ အလိုမကျမှုတွေ၊ တွေဝေ မိန်းမောမှုတွေ တနင့်တပိုး ထမ်းပိုးထားမယ် ဆိုရင်…။      ။

(ခန္ဓာကိုယ်ပေါ်က ဒဏ်ရာ၊ အသည်းက ဒဏ်ရာ၊ အသိမှားတဲ့ ဒဏ်ရာတွေအတွက် ဒဏ်ကြေဆေးတွေ လိမ်းပေးတဲ့ တယောက်သောသူအတွက် ခံစားရေးဖွဲ့ပါတယ်။)

မီးမီးမွေးနှစ် ပြက္ခဒိန်

vivo city က toast box ကော်ဖီဆိုင်မှာ တွေ့လို့ ရိုက်လာတာ... မီးမီးဆိုလို့ ကြည့်လိုက်တော့ ခုနှစ်က ရာဇ၀င်ထဲကခုနှစ် ဖြစ်နေရင်လည်း ခွင့်လွှတ်တော့ကွယ်...

Friday, October 21, 2011

ပဋ္ဌာန်း ပစ္စယနိဒ္ဒေသ မိတ်ဆက် - ၇ (အ၀ိဂတပစ္စည်း)

အ၀ိဂတပစ္စည်း



အ၀ိဂတပစ္စယောတိ -
၁။ စတ္တာရော ခန္ဓာ အရူပိနော အညမညံ အ၀ိဂတပစ္စယေန ပစ္စယော။
၂။ စတ္တာရော မဟာဘူတာ အညမညံ အ၀ိဂတပစ္စယေန ပစ္စယော။
၃။ သြက္ကန္တိက္ခဏေ နာမရူပံ အညမညံ အ၀ိဂတပစ္စယေန ပစ္စယော။
၎။ စိတ္တစေတသိကာ ဓမ္မာ စိတ္တသမုဋ္ဌာနာနံ ရူပါနံ အ၀ိဂတပစ္စယေန ပစ္စယော။
၅။ မဟာဘူတာ ဥပါဒါရူပါနံ အ၀ိဂတပစ္စယေန ပစ္စယော။
၆။ စက္ခာယတနံ စက္ခုဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၇။ သောတာယတနံ သောတ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၈။ ဃာနာယတနံ ဃာန၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၉။ ဇိဝှါယတနံ ဇိဝှါဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၀။ ကာယာယတနံ ကာယ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၁။ ရူပါယတနံ စက္ခုဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၂။ သဒ္ဒါယတနံ သောတ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၃။ ဂန္ဓာယတနံ ဃာန၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၄။ ရသာယတနံ ဇိဝှါဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၅။ ဖောဋ္ဌဗ္ဗာယတနံ ကာယ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၆။ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ မနောဓာတုယာ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။
၁၇။ ယံ ရူပံ နိဿာယ မနောဓာတု စ မနောဝိညာဏဓာတု စ ၀တ္တန္တိ၊ တံ ရူပံ မနောဓာတုယာ စ မနောဝိညာဏဓာတုယာ စ တံသမ္ပယုတ္တကာနဉ္စ ဓမ္မာနံ အ၀ိဂတပစ္စယေန ပစ္စယော။



မကင်းချုပ်သေးဘဲ ပစ္စုပ္ပန်အဖြစ် ထင်ရှားဖြစ်နေ၊ ရှိနေသော အကြောင်းတရားတို့က ကျေးဇူးပြုခြင်းအား အ၀ိဂတပစ္စည်းဟု ခေါ်သည်။ အတ္ထိပစ္စည်းနှင့် အဓိပ္ပါယ်အတူတူပင် ဖြစ်သည်။

ပြန်လည် သုံးသပ်ခြင်း

ယခုအထိ ဖော်ပြခဲ့သော ပစ္စည်းတို့အား အကျဉ်းခြုံး၍ ပြန်လည်သုံးသပ်ပါက -
(၁) အာရုံတို့သည် စိတ်စေတသိက်တို့အား အာရမ္မဏပစ္စည်းဖြင့် ကျေးဇူးပြုသည်။
(၂) ၀တ္ထုရုပ်တို့သည် စိတ်စေတသိက်တို့အား (ပုရေဇာတ/သဟဇာတ) နိဿယပစ္စည်းဖြင့် ကျေးဇူးပြုသည်။
(၃) စိတ်စေတသိက်တရားတို့ အချင်းချင်း သမ္ပယုတ္တ၊ အညမည၊ သဟဇာတပစ္စည်းတို့ဖြင့် ကျေးဇူးပြုသည်။
(၄) စိတ်စေတသိက်တို့သည် မိမိတို့ကြောင့်ဖြစ်သော ရုပ်တရားတို့အား (ပဋိသန္ဓေအခိုက်တွင် အတူဖြစ်ဖက် ကမ္မဇရုပ်တို့အား) သဟဇာတပစ္စည်းဖြင့် ကျေးဇူးပြုသည်။
(၅) ကလာပ်တူသော မဟာဘုတ် အချင်းချင်းသည်လည်းကောင်း၊ မဟာဘုတ်တို့က ဥပါဒါရုပ်တို့အား လည်းကောင်း သဟဇာတပစ္စည်းဖြင့် ကျေးဇူးပြုနေကြသည်။
(၆) အတူဖြစ်ဖက် ရုပ်တရား နာမ်တရားတို့သည် သဟဇာတ၀ိပ္ပယုတ္တ၊ အရင်ဖြစ်နှင့်သော ရုပ်တရားတို့သည် နာမ်တရားတို့အား ပုရေဇာတ၀ိပ္ပယုတ္တ၊ နောက်မှဖြစ်သော နာမ်တရားသည် အရင်ဖြစ်နှင့်သော ရုပ်တရားအား ပစ္ဆာဇာတ၀ိပ္ပယုတ္တတို့ဖြင့် ကျေးဇူးပြုနေကြသည်။





သဟဇာတ ၁၅-မျိုး
ပဋ္ဌာန်း ၂၄ ပစ္စည်းတွင် ပစ္စည်း ၁၅-မျိုးတို့သည် တစိတ်တဒေသအားဖြင့် ဖြစ်စေ၊ အားလုံးဖြစ်စေ သဟဇာတပစ္စည်းတွင် အကျုံးဝင်နေကြသည်။
(က) သဟဇာတ ပစ္စည်း အကြီး ၄-မျိုး
၁။ သဟဇာတပစ္စည်း
၂။ (သဟဇာတ) နိဿယပစ္စည်း
၃။ (သဟဇာတ) အတ္ထိပစ္စည်း
၎။ (သဟဇာတ) အ၀ိဂတပစ္စည်း
သဟဇာတပစ္စည်းသည် နိဿယ၊ အတ္ထိ၊ အ၀ိဂတပစ္စည်းတွင် အကျုံးဝင်နေ၍ သဟဇာတနိဿယ၊ သဟဇာတတ္ထိ၊ သဟဇာတာဝိဂတပစ္စည်းတို့သည် သဟဇာတပစ္စည်းနှင့် အလုံးစုံတူသည်။


(ခ) သဟဇာတ ပစ္စည်း အလတ် ၄-မျိုး
၁။ အညမညပစ္စည်း
၂။ ၀ိပါကပစ္စည်း
၃။ သမ္ပယုတ္တပစ္စည်း
၎။ (သဟဇာတ) ၀ိပ္ပယုတ္တပစ္စည်း
ဤသဟဇာတပစ္စည်းအလတ် ၄-မျိုးတို့သည် သဟဇာတပစ္စည်းမှ ခွဲထွက်လာသော ပစ္စည်းများ ဖြစ်ကြသည်။


(ဂ) သဟဇာတ ပစ္စည်း အငယ် ၇-မျိုး
၁။ ဟေတု
၂။ (သဟဇာတ) အဓိပတိ
၃။ (သဟဇာတ) ကမ္မ
၎။ (သဟဇာတ) အာဟာရ
၅။ (သဟဇာတ) ဣန္ဒြိယ
၆။ စ်ာန
၇။ မဂ္ဂ
ဤသဟဇာတ ပစ္စည်း အငယ် ၇-မျိုးတို့သည် ယင်းတို့နှင့် ယှဉ်ဖက်တရားတို့အားလည်းကောင်း ယင်းတို့ကြောင့်ဖြစ်သော (အတူဖြစ်ဖက်) ရုပ်တရားတို့အား ကျေးဇူးပြုနေကြသော သဟဇာတပစ္စည်းများ ပင်ဖြစ်သည်။ “... သမ္ပယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ ... ပစ္စယေနပစ္စယော” ဟူသော ပုံစံဖြင့် ပစ္စယနိဒ္ဒေသတွင် တွေ့ရသော ပစ္စည်းများပင် ဖြစ်သည်။




ဆက်ရန် ...

Wednesday, October 19, 2011

ပဋ္ဌာန်း ပစ္စယနိဒ္ဒေသ မိတ်ဆက် - ၆ (အတ္ထိပစ္စည်း)

အတ္ထိပစ္စည်း



အတ္ထိပစ္စယောတိ -
၁။ စတ္တာရော ခန္ဓာ အရူပိနော အညမညံ အတ္ထိပစ္စယေန ပစ္စယော။
၂။ စတ္တာရော မဟာဘူတာ အညမညံ အတ္ထိပစ္စယေန ပစ္စယော။
၃။ သြက္ကန္တိက္ခဏေ နာမရူပံ အညမညံ အတ္ထိပစ္စယေန ပစ္စယော။
၎။ စိတ္တစေတသိကာ ဓမ္မာ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော။
၅။ မဟာဘူတာ ဥပါဒါရူပါနံ အတ္ထိပစ္စယေန ပစ္စယော။
၆။ စက္ခာယတနံ စက္ခုဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၇။ သောတာယတနံ သောတ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၈။ ဃာနာယတနံ ဃာန၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၉။ ဇိဝှါယတနံ ဇိဝှါဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၀။ ကာယာယတနံ ကာယ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၁။ ရူပါယတနံ စက္ခုဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၂။ သဒ္ဒါယတနံ သောတ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၃။ ဂန္ဓာယတနံ ဃာန၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၄။ ရသာယတနံ ဇိဝှါဝိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၅။ ဖောဋ္ဌဗ္ဗာယတနံ ကာယ၀ိညာဏဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၆။ ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ မနောဓာတုယာ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။
၁၇။ ယံ ရူပံ နိဿာယ မနောဓာတု စ မနောဝိညာဏဓာတု စ ၀တ္တန္တိ၊ တံ ရူပံ မနောဓာတုယာ စ မနောဝိညာဏဓာတုယာ စ တံသမ္ပယုတ္တကာနဉ္စ ဓမ္မာနံ အတ္ထိပစ္စယေန ပစ္စယော။



အတ္ထိဟူသည် “ရှိခြင်း”ဟု အဓိပ္ပါယ်ရ၏။ ပစ္စုပ္ပန်သဘောအားဖြင့် ထင်ရှားရှိနေသော အကြောင်းတရားတို့က အကျိုးတရားအား ဖြစ်စေရန်၊ တည်တံ့စေရန် ထောက်ပံ့ ကျေးဇူးပြုခြင်းအား အတ္ထိပစ္စည်းဟု ခေါ်သည်။

အတ္ထိပစ္စည်း ၀ါကျအမှတ် ၁ မှ ၅ အထိ ၅-မျိုးသည် သဟဇာတပစ္စည်း အမှတ် ၁ မှ ၅ အထိ နှင့် တူသဖြင့် သဟဇာတတ္ထိ ပစ္စည်းဟု ခေါ်သည်။

၁။ စတ္တာရောခန္ဓာ အရူပိနော- ရုပ်မဟုတ်သော (နာမ်)ခန္ဓာလေးပါးတို့သည်၊
အညမညံ- အချင်းချင်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၂။ စတ္တာရော မဟာဘူတာ- မဟာဘုတ် လေးပါးတို့သည်၊
အညမညံ- အချင်းချင်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၃။ သြက္ကန္တိက္ခဏေ နာမရူပံ - အမိဝမ်းသို့ သက်ဝင်ခိုက် (ပဋိသန္ဓေခဏ) တွင် နာမ်နှင့် ရုပ်တို့သည်၊
အညမညံ- အချင်းချင်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၎။ စိတ္တစေတသိကာ ဓမ္မာ - စိတ်စေတသိက်တရားတို့သည်၊
စိတ္တသမုဋ္ဌာနာနံ ရူပါနံ - စိတ်ကြောင့်ဖြစ်သော ရုပ်တရားတို့အား၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၅။ မဟာဘူတာ - မဟာဘုတ်တို့သည်၊
ဥပါဒါရူပါနံ - ဥပါဒါရုပ်တို့အား၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။

ဝါကျ အမှတ် ၆ မှ ၁၆ အထိ ၁၁-မျိုးသည် ပုရေဇာတပစ္စည်း အမှတ် ၁ မှ ၁၁ အထိနှင့် တူသဖြင့် ပုရေဇာတတ္ထိ ပစ္စည်း ဟုခေါ်သည်။


၆။ စက္ခာယတနံ - မျက်စိအကြည်ဟူသော ဖြစ်တည်ရာသည်
စက္ခုဝိညာဏဓာတုယာ - မြင်သိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုမြင်သိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၇။သောတာယတနံ - နားအကြည်ဟူသော ဖြစ်တည်ရာသည်၊ 
သောတ၀ိညာဏဓာတုယာ - ကြားသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုကြားသိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်
၈။ ဃာနာယတနံ - နှာခေါင်းအကြည်ဟူသော ဖြစ်တည်ရာသည်
ဃာန၀ိညာဏဓာတုယာ - နံသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုနံသိစိတ်နှင့် ယှဉ်ဖက်တရားတို့အား၎င်း
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၉။ ဇိဝှါယတနံ - လျှာအကြည်ဟူသော ဖြစ်တည်ရာသည်
ဇိဝှါဝိညာဏဓာတုယာ - အရသာသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုအရသာသိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၁၀။ ကာယာယတနံ - ကိုယ်အကြည်ဟူသော ဖြစ်တည်ရာသည်၊
ကာယ၀ိညာဏဓာတုယာ - တွေ့ထိသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုတွေ့ထိသိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၁၁။ ရူပါယတနံ - အဆင်းအာရုံသည်၊
 စက္ခုဝိညာဏဓာတုယာ - မြင်သိစိတ်အား(၎င်း)၊
 တံ သမ္ပယုတ္တကာနဉ္စ ဓမ္မာနံ - ထိုမြင်သိစိတ်နှင့် ယှဉ်ဖက်တရားတို့အား၎င်း၊
 အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၁၂။ သဒ္ဒါယတနံ - အသံအာရုံသည်၊
 သောတ၀ိညာဏဓာတုယာ - ကြားသိစိတ်အား(၎င်း)၊
 တံ သမ္ပယုတ္တကာနဉ္စ ဓမ္မာနံ - ထိုကြားသိစိတ်နှင့် ယှဉ်ဖက်တရားတို့အား၎င်း၊
 အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၁၃။ဂန္ဓာယတနံ - အနံ့အာရုံသည်၊
ဃာန၀ိညာဏဓာတုယာ - နံသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုနံသိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။
၁၄။ရသာယတနံ - ရသာအာရုံသည်၊
 ဇိဝှါဝိညာဏဓာတုယာ - အရသာသိစိတ်အား(၎င်း)၊
 တံ သမ္ပယုတ္တကာနဉ္စ ဓမ္မာနံ - ထိုအရသာသိစိတ်နှင့် ယှဉ်ဖက်တရားတို့အား၎င်း၊
 အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၁၅။ဖောဋ္ဌာဗ္ဗာယတနံ - အတွေ့အာရုံသည်၊
 ကာယ၀ိညာဏဓာတုယာ - တွေ့ထိသိစိတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုတွေ့ထိသိစိတ်နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိစ္စည်းဖြင့်) ကျေးဇူးပြုသည်။
၁၆။ရူပါယတနံ သဒ္ဒါယတနံ ဂန္ဓာယတနံ ရသာယတနံ ဖောဋ္ဌဗ္ဗာယတနံ - အဆင်း၊ အသံ၊ အနံ့၊ အရသာ၊ အတွေ့ထိအာရုံတို့သည်၊
မနောဓာတုယာ - မနောဓာတ်အား(၎င်း)၊
တံ သမ္ပယုတ္တကာနဉ္စ ဓမ္မာနံ - ထိုမနောဓာတ်နှင့် ယှဉ်၍ဖြစ်သော တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။

ဝါကျ အမှတ် ၁၇ သည် နိဿယပစ္စည်း ၀ါကျအမှတ် ၁၁ နှင့်တူ၏။ ဟဒယ၀တ္ထုရုပ်သည် ပဋိသန္ဓေအခိုက်တွင် သဟဇာတနိဿယ ပစ္စည်း၊ ပ၀တ္ထိအခိုက်မှာ ၀တ္ထုပုရေဇာတနိဿယ ပစ္စည်းဖြင့် ကျေးဇူးပြုကြ၍၊ ပစ္စုပ္ပန်တွင် ထင်ရှားရှိသော ၀တ္ထုရုပ်က မနောဓာတ်၊ မနောဝိညာဏဓာတ်တို့အား ကျေးဇူးပြုခြင်း ဖြစ်၍ အတ္ထိပစ္စည်းဖြင့် ကျေးဇူးပြုသည်လည်း မည်၏။

၁၇။ ယံ ရူပံ နိဿာယ - အကြင် (ဟဒယ၀တ္ထု) ရုပ်ကို မှီ၍၊
မနောဓာတု စ - မနောဓာတ်သည်၎င်း၊
မနောဝိညာဏဓာတု စ - မနောဝိညာဏ်ဓာတ်သည်၎င်း၊
ဝတ္တန္တိ - ဖြစ်ကြကုန်၏။
တံ ရူပံ - ထို (ဟဒယ၀တ္ထု) ရုပ်သည်၊
မနောဓာတုယာ စ - မနောဓာတ်အား၎င်း၊
မနောဝိညာဏဓာတုယာ စ - မနောဝိညာဏ်ဓာတ်အား၎င်း၊
တံ သမ္ပယုတ္တကာနဉ္စ ဓမ္မာနံ - ထိုမနောဓာတ်၊ မနောဝိညာဏ်ဓာတ်တို့နှင့် ယှဉ်ဖက်တရားတို့အား၎င်း၊
အတ္ထိပစ္စယေန ပစ္စယော - ထင်ရှားရှိသည်ဖြစ်၍ (အတ္ထိပစ္စည်းဖြင့်) ကျေးဇူးပြုသည်။

ပစ္စယနိဒ္ဒေသတွင် အတ္ထိပစ္စည်းအား ဤမျှသာ ထုတ်ပြထားသော်လည်း ပဋ္ဌာန်း ပဥှာဝါရပိုင်းတွင် (၁) သဟဇာတတ္တိ၊ (၂) ပုရေဇာတတ္ထိ၊ (၃) ပစ္ဆာဇာတတ္ထိ (၄) အာဟာရတ္ထိ၊ (၅) ဣန္ဒြိယတ္ထိ ဟူ၍ အတ္တိပစ္စည်း ၅-မျိုးကို ဟောကြားထားသည်။ ဤတွင် အာဟာရတ္ထိ ပစ္စည်းနှင့် ဣန္ဒြိယတ္ထိ ၂-မျိုးအား ပရိယာယ်အားဖြင့် သဟဇာတအုပ်စုတွင် ထည့်သွင်းလေ့ရှိသည်။ (မည်သည့်အတွက်ကြောင့် သဟဇာတအုပ်စုတွင် ထည့်ရကြောင်းကို အာဟာရပစ္စည်းနှင့် ဣန္ဒြိယ ပစ္စည်း အပိုင်းတွင် ဖော်ပြသွားပါမည်။)



ဆက်ရန်...