Friday, June 1, 2012

မနေတတ်… မထိုင်တတ်…



အခုတလော မကြာခဏ သတိရမိပြီး တယောက်တည်း ပြုံးနေမိတဲ့ မိသားစုထဲက ဟာသလေးအကြောင်း သူငယ်ချင်းတွေနဲ့ အတူတူ ပြုံးရအောင်လို့ ပြောပြချင်ပါတယ်။ ကလေးတွေရဲ့ အပြစ်ကင်း ဖြူစင်တဲ့ အတွေးနဲ့၊ ပြောတတ်သလို ပြောလိုက်တဲ့ စကားလေးတွေဟာ လူကြီးတွေရဲ့ စိတ်နှလုံးကို ကြည်မွေ့စေ ဘ၀အမောတွေကို ပြေပျောက်စေပါတယ်။

ဒီတခါ ဇတ်လိုက်ကတော့ အိမ်က မင်းသားနှစ်ယောက်ဖြစ်တဲ့ ရေချမ်း၊ ရေစင်တို့ မဟုတ်ပါဘူး။ မသီတာရဲ့ တူလေး ပါ။ မင်းသားအမည်ကို ရေသန့် လို့ မှတ်ထားလိုက်ကြပါစို့။ ရေသန့်လေး အမေ မသီတာ့ယောင်းမက မိန်းမပီသတဲ့ ဆရာမဟောင်းတဦးပါ။ အချက်အပြုတ်၊ အနေအထိုင်၊ အပြောအဆို အင်မတန် တော်ပါတယ်။ မွေးထားတဲ့ သားနဲ့ သမီးကိုလည်း နားဝင်အောင် ညင်ညင်သာသာ ဆုံးမတတ်ပါတယ်။

ရေသန့်က အိမ်က သားကြီး ရေချမ်းထက်ငယ်ပြီး၊ သားငယ်ရေစင်ထက်တော့ ကြီးပါတယ်။ ဒီက ကလေးတွေ ဒီဇင်ဘာကျောင်းပိတ်ရက် ရန်ကုန်ပြန်မှ တနှစ်တခါ တွေ့ရတာမို့ ညီအကိုချင်းတွေ တွေ့စဆို စိမ်းပါတယ်။ မနှစ်ကတော့ သားကြီး ရေချမ်းက မသီတာထက် နှစ်ပတ်စောပြီး ရန်ကုန်ကို ပြန်သွားနှင့်ပါတယ်။ မသီတာရောက်ပြီး နောက်တရက်နှစ်ရက်နေတော့ သားကြီး ရေချမ်းက မသီတာကို ပြောလာပါတယ်… “မေမေ…မေမေ… ရေသန့်ကလေ ဘာဖြစ်လို့လဲ မသိဘူး သားကို တွေ့ရင် ကိုကိုနေကောင်းလား… ကိုကိုနေကောင်းလားချည်းပဲ မေးနေတယ်” တဲ့…။

ရေသန့်လေးခမျာ အဝေးတနေရာက လာတဲ့ အကိုလုပ်သူကို အတူနေရတုန်းလေးမှာ အရေးတယူကလည်း လုပ်ချင်၊ ဘာလုပ်လို့ ဘာပြောရမှန်းလည်း မသိရှာတော့၊ သူပြောတတ်တာလေး “ကိုကိုနေကောင်းလား” ဆိုတာကိုပဲ တွေ့လိုက်တိုင်း ဆီးကြိုပြောရတာပါ။ အမေးခံရတဲ့ အကိုကြီးကလည်း မြန်မာမှုမှာ လည်လည်ဝယ်ဝယ်ဆိုတော့၊ မျက်လုံးကလယ်ကလယ် ပါးစပ်အဟောင်းသားနဲ့ ဘာပြန်ပြောရမှန်းမသိ…။ သူတို့ဖြစ်နေပုံကို ဘေးက လူကြီးတွေက  ရယ်ရ ပြုံးရပါတယ်။

တခါတော့ မသီတာ့ယောင်းမ… ကိုရေသန့်တို့ရဲ့ မာတာမိခင်ကြီးကိုယ်တိုင် ပါးစပ်အဟောင်းသား ဖြစ်သွားရရှာပါတယ်။ ဖြစ်ပုံကတော့ ဒီလိုပါ…။ ရင်စေ့၊ ရင်ဖုံး အင်္ကျီလေးတွေသာ ၀တ်တတ်ပြီး အနေရိုးတဲ့ ယောင်းမဟာ တခုသော ပူပြင်းလှတဲ့ နွေညဦးမှာ ညအိပ်ယာဝင်ခါနီးမို့ လည်ပင်းပေါက် အနည်းငယ်ကျယ်တဲ့ ချိုင်းပြတ် အင်္ကျီကို ၀တ်ပြီး၊ ခန္ဓာကိုယ် အပေါ်ပိုင်းကို ကိုင်းလို့ အိပ်ယာကို ဖုန်ခါလှဲမိတဲ့ အခါမှာတော့ သားတော်မောင် ကိုရေသန့် မျက်မှောင်ကုတ်ကြီးနဲ့ မအေကို ပြောလိုက်တာက… “အမေတို့ကလည်း အဖေ့ရှေ့မှာ မနေတတ်၊ မထိုင်တတ်…” တဲ့။

9 comments:

Thandar Lwin said...

သဘောကျ လို့ ပြုံးမိတယ် ...း)

Anonymous said...

ကိုရေသန့်ရှေ့ အနေအထ်ိုင် ဆင်ခြင်ကြပါ.. :))

pifpif

mstint said...

ရေသန့်လေးအပေါ် မိခင်ဖြစ်သူရဲ့ အုပ်ထိန်းမှုစနစ်ကျပုံ မှန်းဆလို့ရတယ် သီတာရေ။ ကလေးငယ်တွေရဲ့ ဖြူစင်တဲ့အတွေးနဲ့ အပြောအဆိုဟာ ကြည်နူးစရာ ပျော်ရွှင်စရာကောင်းတာအမှန်ပဲ။
စိတ်ဓာတ်အစဉ်ကြည်လင်အေးမြပါစေကွယ်။

မေတ္တာဖြင့်
အန်တီတင့်

သက်ဝေ said...

ရယ်လိုက်ရတာ ကိုရေသန့်လေးရယ်... အင်းလေ.. သူကလည်း သူ ပြောတတ်သလို ပြောတာကိုး...း)))

မမသီရိ said...

ဖြစ်ရလေတယ်..း)

ဇွန်မိုးစက် said...

:))

Anonymous said...

ဟုတ်ပ.. မသီတာရယ်။ ကိုယ်လည်း သားတော်မောင်ရဲ့ အုပ်ထိန်းမှုနဲ့ အဝတ်အစားဝယ်ပြီးလည်း အကြောင်းကြားရ၊ မဝယ်ခင်လည်း အကြံပေးရင်ယူရ .. သူကိုယ်တုိုင်က ဘောင်းဘီတိုမဝတ်၊ စွပ်ကျယ် ဂျိုင်းပြတ်မဝတ်ဆိုတော့လေ ...
မနော်

Anonymous said...

အခုမှ ဖတ်ရတယ်..။
ရယ်နေတယ်..။
ရေသန့်လေး နေကောင်းလားလို့
မေးတယ် ပြောပေးပါ..။


ပေါက်

T T Sweet said...

ရယ်ရတယ် အစ်မ။ မြန်မာပြည်ကခလေးတွေ စကားပြောတာ တစ်ခါတစ်လေ ရပ်ကွက်သိပ်ဆန်တယ်။ ရန်ကုန်က ၇နှစ်အရွယ်တူမတစ်ယောက်လဲ အဲလိုပဲ။ သူပြောတာတွေ နားထောင်ပြီး ရယ်နေရတယ်။