Q.E.D

သင်္ချာဘာသာ သင်ယူခဲ့ရခြင်း၏ အကျိုးကျေးဇူးကို စဉ်းစားမိတိုင်း၊ အသုံးချ သင်္ချာပညာရပ်များထက် သင်္ချာသင်ခန်းစာများဖြင့် “စိတ်ကူးဉာဏ် ကွန့်မြူးတတ်စေရန်၊ အမြင်ကျယ်စေရန်၊ တစ်ယူ မသန်စေရန်” စသည့် အကျင့်စရိုက်များကို ပြုစုပျိုးထောင်ပေးခဲ့သည်ကို ပို၍ ကျေးဇူးတင်မိသည်။ ထိုအကြောင်းကို စဉ်းစားမိတိုင်းလည်း အထက်တန်း ကျောင်းသားဘ၀က ဂျီသြမေတြီ သင်္ချာဘာသာကို သင်ကြားပေးခဲ့သော ဆရာအား အထူး အမှတ်ရမိသည်။

သင်ခန်းစာတစ်ခု စပြီဆိုလျှင် ဆရာက ထိုသင်ခန်းစာအတွက် လိုအပ်သော သီအိုရမ် သက်သေပြချက်များကို သင်ပုန်းပေါ်တွင် သေချာစွာ တွက်ပြသည်။ သို့သော် ပုစ္ဆာများကိုမူ ဆရာက ကိုယ်တိုင် တွက်ပြလေ့ မရှိ။ အတန်းထဲမှ ကျောင်းသား တစ်ယောက်ယောက်ကို ထ၍ ပြောခိုင်းသည်။ ထုံးစံအတိုင်း ဂျီသြမေတြီ ပုစ္ဆာများကို တွက်သောအခါ construction line များဆွဲရသည်။ အဖြေရရန်အတွက် ငြမ်းဆင်ရသော သဘောပင်။ သို့သော် အဆောက်အအုံတစ်ခု၏ ငြမ်းများကဲ့သို့ ပုံသေကားကျ ဆောက်ရသည့် ငြမ်းများတော့ မဟုတ်။ မိမိတို့၏ စိတ်ကူးဉာဏ် အလျောက် construction line အမျိုးမျိုး ဆွဲနိုင်သည်။

“ဘယ်နေရာကနေ ဘယ်နေရာကို ဆွဲမယ်”ဟု ကျောင်းသားက ပြောလိုက်လျှင်၊ ဆရာက သင်ပုန်းပေါ်တွင် ရောင်စုံမြေဖြူများဖြင့် construction line များကို ဆွဲပြီး၊ “ဘာကြောင့် ဒီလို ဆွဲသလဲ၊ ရှေ့ ဘာဆက်လုပ်မလဲ” ဟု မေးသည်။ တစ်ခါတစ်လေ ကျွန်တော်တို့တွင် တိတိကျကျ အဖြေမရှိ။ အစတွင် မြေစမ်း ခရမ်းပျိုးသည့် သဘောနှင့် ဆွဲလိုက်ရသော်လည်း၊ နောက်မှ ရှေ့ဘာဆက်လုပ်ရမည်ကို မြင်လာတတ်သည်။ တစ်ခါတစ်လေတော့လည်း ရောင်စုံလိုင်းတွေသာ များပြားရှုတ်ထွေးလာသည်၊ ရှေ့ ဘာဆက်လုပ်ရမည်ကား မသိ။ ထိုအခါ ဘေးမှ “ဟိုလိုလုပ်… ဒီလိုလုပ်” အကြံပေးသူများလည်း ရှိတတ်သည်။ ရှေ့ဆက်တိုးနိုင်ဟန် မပေါ်လျှင်တော့ ဆရာက နောက်တစ်ဦးဦးကို ထခိုင်းသည်။ နောက်လူက ရှေ့လူ ဆွဲခိုင်းထားသည့် လိုင်းများကို ပြန်ဖျက်ခိုင်းချင်လည်း ခိုင်းတတ်သည်။ ဆရာက မညီးမညူ ပြန် ဖျက်ပေး၏။ ကျွန်တော်တို့ တည်ဆောက်လိုက်သော construction lines များပေါ်မူတည်၍ အဖြေရောက်ဖို့ အနှေးနှင့် အမြန် ကွာနိုင်ပါသည်။ မည်သည့်နည်းက မှန်၍ မည်သည့်နည်းက မှားသည် ဆိုခြင်းထက်၊ မည်သည့် နည်းက ပို၍ကောင်းသည်သာ ကွာတတ်၏။ တစ်ခါတရံတွင်လည်း မည်သည့်နည်းက ပိုကောင်းသည်ဟုပင် မဆိုသာ။ နည်းလမ်း အမျိုးမျိုးဖြင့်ပင် ကျွန်တော်တို့ လိုချင်သော အဖြေကို ရနိုင်ပါသည်။ နောက်ဆုံး အဖြေရောက်လျှင် ဆရာက “သက်သေ ပြပြီးပြီ quod erat demonstrandum” ဟု အဓိပ္ပါယ်ရသည့် Q.E.D ဟူသော စာလုံးသုံးကို ခပ်ကြီးကြီး ရေးချလိုက်သည်။ ကျွန်တော်တို့ အားလုံး ၀မ်းသာကြရသည်။

“မည်သည့်နည်းက မှန်၍ မည်သည့်နည်းက မှားသည် ဆိုခြင်းထက်၊ မည်သည့် နည်းက ပို၍ကောင်းသည်သာ ကွာတတ်၏” ဆိုခဲ့သော်လည်း ကျွန်တော်တို့ ကျောင်းသားများသည် အမှား မကင်းကြ။ ထိုအမှားများသည် construction lines တည်ဆောက်ပုံခြင်း မတူ၍ မဟုတ်။ ဂျီသြမေတြီဘာသာ၏ စည်းမျဉ်းများ၊ ဥပဒေသများကို လိုက်နာရန် ပျက်ကွက်၍ သာဖြစ်သည်။ ကျွန်တော်တို့ တည်ဆောက်စေလိုသော construction line များ၊ တွက်နည်းများသည် စည်းကမ်းဘောင်အတွင်းတွင် ရှိနေသ၍ ဆရာသည် ကျွန်တော်တို့ ပြောသမျှ သင်ပုန်းပေါ်တွင် မညီးမညူ လိုက်၍ ဆွဲ၊ လိုက်၍ ရေးသော်လည်း၊ စည်းဘောင်လွတ်သွားသည်နှင့် လိုက်မရေး မဆွဲတော့ဘဲ ကျောင်းသားများ အားလုံးဘက်သို့ လှည့်၍ “ကဲ ဘာလွဲနေသလဲ” ဟူသော အကြည့်ဖြင့် ကြည့်ကာ တည့်မတ်ပေးတတ်၏။

မတူညီသော အမြင်များ၊ ကွဲလွဲသော နည်းလမ်းများအား သဘောထားကြီးကြီး အမြင်ကျယ်ကျယ် လက်ခံရမည် ဖြစ်သော်လည်း၊ လွဲချော်နေသော အခြေခံမူ၊ စည်းမျဉ်း၊ ဥပဒေသများပေါ်တွင် အခြေခံသည့် ကွဲလွဲမှုမျိုးဖြင့် အဖြေရောက်နိုင်သည်ဟုကား လက်ခံ၍ မရနိုင်ပေ။