အသွင်မတူ အိမ်သူမဖြစ်

“အသွင်မတူ အိမ်သူမဖြစ်” ဆိုတဲ့ ဆိုရိုးစကားက ဘယ်လောက် အတိုင်းအတာထိ မှန်သလဲ မသိပေမယ့်၊ ရာခိုင်နှုန်း အတော်များများ မှန်မယ်လို့ ထင်တယ်။ သိပ်လေးစားတဲ့ ရူပဗေဒ ဆရာတစ်ယောက်ရဲ့ သီအိုရီကို သတိသွားရမိတယ်။ “လင်မယားတွေက ရုပ်တူကြတာ များတယ်၊ ဘာကြောင့်လဲဆိုတော့ လူဆိုတာ ကိုယ်ကိုယ်ကို သိပ်ချစ်တော့ ကိုယ်နဲ့ တူတဲ့လူကို ရွေးကြိုက်တတ်တယ်” တဲ့။ မသီတာကလည်း မကြာခဏ ပြောလေ့ရှိတယ် … “လင်မယားတွေဟာ ရုပ်တူတူ လာတတ်တယ်” တဲ့။ လင်ရယ် မယားရယ်လို့ အတူတကွ အနေကြာလာတော့ အတွေးအခေါ်တွေ, စရိုက်တွေ (တမင် ညှိယူတာ မဟုတ်တောင်) ကူးစက်သွားတာတော့ သေချာပါတယ်။ ဒါပေမယ့်လည်း အမြင်ကွဲလွဲမှု, စရိုက်ကွဲလွဲမှုတွေကတော့ ရှိနေဦးမှာပါ။ ဒီတော့ ကွဲလွဲမှုတွေကို နားလည် ခွင့်လွှတ် ပေးတတ်ဖို့ကလည်း အရေးကြီးပါတယ်။ ဒါကြောင့် “အသွင်မတူ အိမ်သူမဖြစ်” ဆိုတဲ့ စကားကို ရာခိုင်နှုန်းပြည့် မထောက်ခံ မိတာပါ။

သူငယ်ချင်းသက်ဝေက အသွင်တူ၏။ မတူ၏။ ရေးဖို့တဂ်တော့ တစုံတွဲနေတဲ့ ကိုယ်တို့နှစ်ယောက်အကြာင်း ဟိုလူကြီး ရင်ဘတ်ထဲ ဘယ်လောက်များရှိသလဲ သိချင်မိတဲ့ အကြံနဲ့ ဒါလေး ရေးပေးဆိုလို့ ရေးပေးတာတဲ့လေ… ကိုယ်မျှော်လင့်ထားတာနဲ့ တခြားစီ… ပတ်ချာကို လည်နေတာပဲ…။ ဒီက ပြောတာကဖြင့် လင်မယားတွေကို ယှဉ်တွဲ ယှဉ်တွဲ အမြင်များလာတာရယ်၊ တစ်မိုးထဲအောက်နေ တစ်အိုးထဲက စားနေလို့ ဥတုကြောင့် ဖြစ်တဲ့ရုပ်၊ အာဟာရကြောင့်ဖြစ်တဲ့ရုပ်တွေ တူလာတာရယ်ကို ပြောချင်တာ။ နောက် အ၀တ်အစား အဆင်အပြင်ကအစပေါ့လေ။ သိပ်ကွာခြားနေရင် ကြည့်မကောင်းဘူး မဟုတ်လား။ အချို့ဆို အင်္ကျီဆင်တူလေးများတောင် ၀တ်လို့ တူအောင် အားထုတ်ကြတော့ တူလာတာပေါ့။

အဲ့ဒီလိုပါ ကိုဧရာက “ရှင်းနေတာတွေကို ရှုပ်အောင်လုပ်၊ ပြီးတော့မှ ပြန်ရှင်း၊ အဲ့ဒါဆို ပိုရှင်းသွားရော...” ဆိုတဲ့ ပန်းမြိုင်လယ်က ဥယျာဉ်မှူး ဇာတ်ကားထဲက ဘီအီးဒီအောင်သိုက်ရဲ့ သဘောတရားနဲ့ သွားနေတဲ့ လူစားမျိုး။
မသီတာကတော့ သိပ်စိတ်မရှည်တတ်ဘူး။ ဟေ့…ဟေ့… ဒီမှာ အပိုစာသားတွေနဲ့ စာမျက်နှာတွေ များနေပြီ လို့ ဘုတောတတ်သူ…။ တခါတလေတော့လည်း မသီတာက

ဧရာဆိုတာ မြစ်တစင်း ဆိုရင် ဘယ်နေရာမှာ စီးစီး အေးချမ်းမှုတွေနဲ့ ပတ်ဝန်းကျင်ကို အကျိုးဆောင်မှာ…

အဲ့လိုတွေ.. အဲ့လိုတွေ ကဗျာဆန်ချင်ပြန်ရင်လည်း သူကပါမလာ ပြန်ဘူး…။ ငုတ်တုတ်ကြီး ကျန်ခဲ့လို့ ဒီက ဒေါတွေမောတွေနဲ့ ပြန်လှည့်ခေါ်ရပြန်ရော…။ အဲ့ဒီအခါကျတော့လည်း “ကိုယ်မှမသိပဲ” ဆိုတဲ့ မျက်နှာသေလေးနဲ့
“ဘာမသိတာတုန်း… မသိဘူး ဆိုတာနဲ့ပြီးရောလား… မသိဘူး ဆိုတာကို မကြိုက်တာ…” မသီတာ့ ပါးစပ်က ကာရန်မပါတာတွေ ရေရွတ်ရပြန်ရော…။ စိတ်ထဲကတော့ အူတူတူလေးကို ကြိတ်ကြိုက်နေတာ…။

ဆိုလိုတာက ကိုဧရာက မသီတာနဲ့မှ မဟုတ်ပါဘူး။ ဂျူလီယာဖြစ်ဖြစ် အမီနာဖြစ်ဖြစ် ဘယ်သူနဲ့ မဆို အဆင်ပြေမည့် လူစားမျိုးပါ။ စိတ်ကောင်းရှိပါတယ်။ ရိုးသားပါတယ်။ သည်းခံတတ်ပါတယ်။ (ကိုယ့်လူမို့ အမွှန်းတင်နေတာ မဟုတ်ပါဘူး။ မသီတာ ချဉ်ဖတ်ကြိုက်လို့ပါ။) အဲ့ဒါကို ပြောင်းပြန်လှန်တော့ မသီတာပေါ့လေ… ဒီက အဖို့မှာတော့ သူနဲ့သာ မဆုံရင်…

ကဲပါလေ ကိုဧရာနဲ့ မသီတာ အသွင်တူ၏။ မတူ၏။ ပို့စ်လေး ဖတ်အပြီးမှာ လိုက်ဖက်ညီ၏။ မညီ၏ ဆိုတာကို လူကြီးမင်းများ ကိုယ်တိုင်ပဲ အဆုံးအဖြတ်ပေးခဲ့ကြပါ။
ကိုဧရာကတော့ ပြောပါတယ် မသီတာကို သိပ်လှစေချင်ပါသတဲ့။ (စိတ်ကလေး သိပ်လှစေချင်ပါသတဲ့ …။)

ဆက်စပ်ဖတ်ရှုရန် - ချစ်သူများအတွက် လက်ဆောင်

ဒီ ပို့စ်လေးကို ဘလော့ဂ်ကတဆင့် ခင်မင်ရသူတွေကို တဂ်ချင်ပါတယ်။

ပထမဦးဆုံးအနေနဲ့ အမျိုးသားများက စပါမယ်
ကိုဂျူလိုင်ဒရင်း ပါ။ (ကိုဧရာက တောင်းဆိုပါတယ်။) Mars and Venus

နောက်...

မလေး လို့ခေါ်တဲ့ အိမ့်ချမ်းမြေ့ --- ထင်းရူးနံ့သင်းသော ဧရာဝတီ
ပန်းနွယ်က မစိမ်းတဲ့ ပန်းနွယ် ---  တူတူ - မတူတူ၊ မထူး
မမရွှေစင်ဦး…--- တနေရာတော့ တူပါလိမ့်မယ်
My world က ဖြိုးဖြိုးလေး --- အသွင်မတူ အိမ်သူမဖြစ်
လသာည ဖြစ်ပါတယ်။ --- အသွင်တူရင်
Yu Wa Yi --- အသွင်တူ၏ မတူ၏

အပျိုတသိုက်ကိုတော့ ချန်ထားခဲ့ရပေါ့း)