Leveraging

သားတို့ ကစားနေတဲ့ ကွန်ပြူတာဂိမ်းတွေ…ကလေးတွေ စွဲတာမပြောပါနဲ့ ကောင်းတာကို လို့ ဘေးကထိုင်ကြည့်နေရင်း

သူ့အဖေက “ဟုတ်တယ်…တော်တော် အချိန်တွေပေးပြီး လုပ်ထားရမှာ ဒါပေမဲ့ ရှေ့ကလုပ်ပြီးသား အခံပေါ်မှာ ဆက်လုပ်သွားရတာပေါ့လေ…အစက စ,ရမယ် ဆိုရင်တော့ ဘယ်လွယ်မလဲ... Leverage. လုပ်သွားရတာပေါ့…” တဲ့

“အဲ့ဒီအကြောင်း နည်းနည်းရေးပေး…”  ဆိုတော့

ပညာဆိုတာမျိုးက ရသမျှ တစတစ စုယူရတာ။ စုတယ်ဆိုတဲ့ နေရာမှာလည်း ဘိုးစဉ်ဘောင်ဆက်တွေရဲ့ အခန်းကဏ္ဍက အရေးပါတယ်ထင်ပါတယ်။ ပစ္စည်းဥစ္စာတောင်မှပဲ မိဘအမွေရတဲ့သူများဟာ မိဘအမွေမရဘဲ အစကနေစပြီး စီးပွားရှာရသူတွေနဲ့တော့ မတူပါဘူး။ ဒီလိုပဲ … မျိုးဆက်သစ်တွေက မိဘဘိုးဘွားတွေဆီက ပညာအမွေအနှစ်တွေကို လက်ခံမယူခဲ့ရင် အစကပြန်ပြန် စ နေရရင် အတော်နဲ့ ရှေ့တတ်ဖို့ မလွယ်ပါဘူး။

တခါက Newton ကို လူတွေက ချီးမွမ်းတော့ သူ့အရင်က ဆရာကြီးတွေရဲ့ ပုခုံးပေါ်ကတက်ကြည့်လို့ သူဝေးဝေး မြင်နိုင်တာပါလို့ ပြောခဲ့ဖူးတယ် (Copernicus, Kepler နဲ့ Galileo တို့သုံးဦးကို ဆိုလိုပါတယ်)။ ပညာသင်ကြားခြင်းဟာ ဘိုးဘွားဘီဘင်တွေဆီက အသိပညာတွေ အတွေ့အကြုံကို ယူလိုက်နိုင်မှ ပိုပြီး ရှေ့ရောက်နိုင်ပါတယ်။ နောက် Einstein ကလည်း Newton တို့ရဲ့ ပခုံးပေါ်က တက်ကြည့်ခဲ့ကြပြန်တယ်။ ဒီနောက် Stephen Hawking လည်း ဒီလိုပါဘဲ။ သူက ဟိုး… Copernicus က စလို့ Newton, Einstein တို့ထိ ရေးခဲ့, တွက်ခဲ့ကြတာတွေကို ပြန်စုပြီး “On the shoulder of Giants” ဆိုတဲ့ စာအုပ်တစ်အုပ် ရေးတယ်။ ဒီဘိုးတော်ကြီးတွေက အလကားပါ… “ကမ္ဘာက နေကို ပတ်တာ, ပန်းသီးကြွေတာ ကမ္ဘာက ဆွဲလို့” ဆိုတာလောက်ပဲ ရေးကြီးခွင်ကျယ် လုပ်ပြောနေခဲ့ကြတယ်။ သူတို့ ငါ့လောက် မသိခဲ့ကြရှာဘူးလို့ သဘောမထားဘဲ၊ ငါသူတို့ ပခုံးတွေပေါ်က ကြည့်ခဲ့လို့ ပိုမြင်တယ်လို့ သူတို့ရဲ့ လုပ်ဆောင်ချက်တွေကို တလေးတစား အသိအမှတ်ပြုတဲ့ အနေနဲ့ စာအုပ်ထုတ်တာပေါ့။ မျိုးဆက်သစ် ရူပဗေဒပညာရှင် တစ်ဦးက ဘိုးဘွားဘီဘင်တို့အပေါ် ကျေးဇူးဆပ်ခြင်းလို့လည်း ဆိုကောင်း ဆိုနိုင်ပါတယ်။

စင်္ကာပူမှာ လုပ်ခဲ့တဲ့ ပထမဦးဆုံးအကြိမ် စာပေဟောပြောပွဲ DVDကို ကိုဧရာ့သူငယ်ချင်းက လက်ဆင့်ကမ်းလို့ ကြည့်လိုက်ရပါတယ်။ ဆရာမ ဂျူးရဲ့ ကဏ္ဍမှာ ဆရာမက…

ပညာသင်ကြားရခြင်း၏ ရည်ရွယ်ချက် ၅ခုကို အတိုချုပ် ပြောသွားခဲ့ပါတယ်။

၁။ Education means career. ဘဝနောင်ရေး စိတ်အေးရမည့် အသက်မွေးဝမ်းကျောင်း ပညာ

၂။ Education teaches how to think. တွေးဆ မျှော်မြင်တတ်တဲ့ အတတ်ကို ရလာအောင် သင်ကြားပေးသည်။

၃။ Education transmits civilization. လူ့ယဉ်ကျေးမှုအဆင့်ဆင့်တိုးတက်လာအောင် မျိုးဆက်တခုမှ တခုသို့ ဆင့်ကဲ ဖြစ်စဉ်နှင့် ပေါင်းစီး ပေးသည့်အရာ ဖြစ်သည်။

၄။ Education liberates individuals. ပညာသည် လူတဦးချင်းစီကို လွတ်မြောက်စေသည့် တွေးခေါ်မျှော်မြင်မှုကို ပေးနိုင်သည်။ 

၅။ Education teaches morality. လူကျင့်ဝတ်သိက္ခာ၊ ကိုယ်ကျင့်သီလကို ပညာက သင်ပေးသည်။

ပြောပြရဦးမည့် အဖြစ်တွေ... ဆိုပြီး မသီတာ ပညာတွေသင်ပြီး အသုံးမချနိုင်လို့ ငြီးတဲ့ပို့စ်ရေးတော့ မိတ်ဆွေ သူငယ်ချင်းတွေက ဝိုင်းအားပေးကြလို့ ကျေးဇူးတင်ပါတယ်။

တကယ်တော့ မသီတာ အလုပ်မရှိလို့ လူရာမဝင်မှာထက်၊ ပညာကို အသုံးမချနိုင်လို့ ဆရာမဂျူး ပြောသွားတဲ့ နံပါတ်(၃) အချက်က အုတ်တချပ်၊ သဲတပွင့်တွေ လျော့လျော့သွားမှာ စိုးတာပါ...