ချို ပေစွ ဟင်းချို

ဒီမှာ အမ တစ်ယောက်နဲ့ သွားရင်းလာရင်း တနေရာအရောက် အမက “ဟယ် ဟိုမှာ ပရန္နဝါတွေ ပရန္နဝါ တွေ…” လို့ ပြပါတယ်။ “သိတယ် မဟုတ်လား… ငယ်ငယ်က သင်ခဲ့ရဖူးတယ်လေ” ဆိုပြီး ကဗျာလေး တပိုင်းတစကို ရွတ်ပြပါတယ်။ ဟုတ်ပါတယ် သင်ခဲ့ရဖူးတယ် ဒါပေမဲ့ လက်တွေ့နဲ့ မဆက်စပ်ခဲ့တော့ ကိုယ့်ဘေးနားရောက်နေတာတောင် မသိဘူးပေါ့။

punarvana (boerhavia diffusa) လို့ ရေးထားပါတယ်။ အာယုဗေဒ ဆိုဒ်တခုမှ ရပါတယ်။

*****

ချို ပေစွ ဟင်းချို

တောင်ခါးပန်းရယ်နှင့်၊ ခင်တန်းငယ် ကုန်းမြောင်၊ ကျော့ကွင်းကို ထောင်သည်၊ ခွေးညီနောင် တခင်ခင်နှင့်၊ ယုန်ရှင်ကို ဖမ်းခဲ့ပါ၊ လေးထမ်းတဲ့သည်ဖေကိုယ်၊ တဲအိမ်နေ ကြင်သူက၊ တအူအူ ဟစ်ခေါ်လို့၊ အမှာတော်ပါးလိုက်ရှာတယ်လေး။

အိမ်ကိုပြန်လျှင်၊ အကျွန်ကျွနု်ပ်၊ ယုန်တစ်တုတ်ကို၊ ခွာဆုတ်ရေလှန်၊ ကျပ်ခိုးခံလို့၊ ပရန္နဝါ၊ ရွက်နုညှာကို၊ ဝါးပြာထည့်ကျို၊ အိုးနားတိုနှင့်၊ ခပ်ချိုညစ်တေ၊ ဆောင့်ကြောင့်ထိုင်မွှေလိုက်တယ်၊ ချိုပေစွဟင်းချိုကို၊ စလောင်းတို အခြေပဲ့နှင့်၊ အာခေါင်မှာ ပူအောင်ထည့်လို၊ မျိုလှည့်ကွဲ့လေး။

(ပဉ္စမတန်း မြန်မာဖတ်စာမှ)

 

ခက်ဆစ်အဖွင့်

၁။ တောင်ခါးပန်း = တောင်ထိပ်နှင့် တောင်ခြေအကြားရှိ တောင်စောင်းအရပ်။

၂။ ခင်တန်း = ကုန်းမြင့်တောင်တန်း။

၃။ ကုန်းမြောင် = ကုန်းမြင့်နှစ်ခုကြား အလျားရှည်၍ အနံကျဉ်းသော ချိုင့်ဝှမ်း။

၄။ ကျော့ကွင်း = ယုန်စသည်တို့ကို ကျော့ပစ်ရန် ကြိုးကွင်း၊ ညွတ်ကွင်း။

၅။ တခင်ခင် = ကိန်ကိန်၊ အိုင်အိုင် အသံမျိုးပြုလျက်။

၆။ တအူအူ = ဆွဲဆွဲငင်ငင် အော်မြည်သည်။

၇။ ယုန်တစ်တုတ် = ယုန်တစ်ကောင်။

၈။ ကျပ်ခိုးခံ = မီးဖိုအထက်တွင်လုပ်ထားသော စင်(ကျပ်စင်)တွင် သားကောင်များကို အခြောက်ခံသည်။

၉။ ပရန္နဝါ = မြေတွင် တွား၍ပေါက်သော အခက်အလက်အရိုးကြွပ်ဆတ်သည့် ဆေးဖက်ဝင်သည့် အပင်တစ်မျိုး။

၁၀။ ဝါးပြာ = ဆားအဖြစ်အသုံးပြုရန် ဝါးကို မီးရှို့၍ရသောပြာ။

၁၁။ ခပ်ချို = ယောက်ချို၊ ဟင်းခပ်ဇွန်းကြီး။

၁၂။ စလောင်း = မြေအိုးအဖုံး စလောင်းဖုံး။

*****

အခု အချိန်မှာ ကဗျာကို ပြန်ဖတ်တော့ ယောကျ်ားဖြစ်သူက ဟင်းစားကို ကိုယ်တိုင်ရှာပြီး၊ ကိုယ်တိုင် ချက်ပြုတ် ခူးခပ် ကျွေးပုံပဲ… သူ့ အိမ်ရှင်မကို…။ မသီတာတို့နဲ့ ဘာတွေများကွာနေပါလိမ့်…အင်း နောက်ဆုံးတော့ မသီတာ တအူအူ မလုပ်တတ်လို့ပဲ နေမှာပါလေလို့ ကောက်ချက်ချလိုက်ပါတယ်။

*****

ဘလော့ဂ်တွေကို အမြဲ အားပေးတဲ့၊ ဘလော့ဂါတွေ စာမရေးရင်လည်း တယောက်ချင်းစီ နာမည်ခေါ်ပြီး ဂရုတစိုက်မေးတတ်တဲ့ အမအတွက် အမှတ်တရ…